اطلاعات روز: د هیواد سویل ختیځ ولایتونه پکتیا، پکتیکا، خوست او لوګر یو ځل بیا شدیدې زلزلې لړزولي دي.
په پکتیکا ولایت کې یوې ځايي سرچینې اطلاعات روز ته وویل، چې نن (دوشنبه، ۲۷ د چنګاښ) مازدیګر مهال د پکتیکا ولایت په ګیان ولسوالۍ کې د شوې زلزلې له امله لسګونه کورونه نړېدلې دي.
د سرچینې په حواله چې اوس مهال له سیمې ځینې ټپیان هم په پیکپ موټرو کې روغتیايي مرکزونو ته استول شوي، خو کره شمېر یې په ډاګه نه کړ.
پکتیکا کې ځایي طالب چارواکو تر اوسه په دې اړه څه نه دي ویلي.
د امریکا د جیولوژیکي سروی ادارې د افغانستان په جنوب ختیځ او شمال ختیځ ولایتونو کې د زلزلو خبر ورکړی.
د دغه مرکز په وینا، نن (دوشنبه، ۲۷ د چنګاښ) شاوخوا ۴:۰۰ بجې د ریښتر په کچه ۵.۱ درجې زلزلې د خوست ولایت ولړزاوه.
په ورته وخت کې دغه مرکز د هېواد په شمال ختیځ بدخشان کې د ریښتر په کچه د ۴.۳ درجې زلزلې د رامنځته کېدو خبر ورکړی دی.
تر اوسه په بدخشان کې د شوې زلزلې له امله د احتمالي زیانونو او ځاني تلفاتو په اړه څه نه دي ویل شوي.
کابو یوه نیمه میاشت وړاندې د زلزلې له امله په خوست او پکتیکا ولایتونو کې د ګڼو مالي زیانونو سربېره سلګونه کسان مړه او ټپیان شول، چې دغه تلفات د پکتیکا په ګیان، برمل او د خوست په سپېرې ولسوالۍ کې اوښتي و.
