د طالبانو د امر بالمعروف وزیر: د اسلامي نظام لپاره نور فرمانونه هم صادرو

اطلاعات روز: د طالبانو د امربالمعروف وزارت چارواکو ویلي د اسلامي نظام د جوړېدو لپاره به ځینې نور فرمانونه هم یو د بل پسې صادر شي.

د طالبانو د سرپرست حکومت د امر بالمعروف وزیر محمد خالد حنیفي پکتیا ولایت ته په سفر کې د طالبانو له ولایتي مسوولینو، دیني عالمانو او قومي مشرانو سره په ګډه ناسته کې ټینګار کړی، چې تېر فرمانونه به عملي کوي او د اسلامي نظام د جوړېدو لپاره به ځینې نور هم صادر شي.

حنیفي زیاته کړې، چې د اسلامي حکومت د بقا لپاره امر بالمعروف وزارت مهم رول لري او د هغه په خبره له نړیوالو فشارونو سره، سره بیا هم له خپلو پرېکړو نه تېریږي.

نوموړي ویلي: «که په یوې سیمه کې امربالمعروف نه وي، نو په هماغه خلکو د خدای قهر نازلیږي، مونږ د دې لپاره مټې را بډ وهلي چې دلته سوچه اسلامي نظام رامنځته کړو او په همدې مخه به ټولې پرېکړې عملي کوو، نور فرمانونه هم په لاره دي.»

هغه همدا راز د خپلو خبرو پر مهال په امریکا او ناټو نیوکه کړې، چې د افغانستان په کورنیو چارو کې لاس وهنه کوي.

د حنیفي په خبره دوحه کې له امريكا سره شوې هوکړه د طالبانو حکومت عملي کړې، خو برعکس امریکا ورڅخه سرغړونه کړې ده.

ده د جوړې شوې غونډې پر مهال له ولسي خلکو غوښتنه وکړه، چې د طالبانو له حکومت سره همکارۍ ته دوام ورکړي، په داسې حال کې اوسني نظام د خلکو هغه غوښتنه چې د نجونو ښوونځیو خلاصون دی، تر اوسه یې ورته مثبت ځواب نه دی ویلی.

د طالبانو امربالمعروف وزارت په داسې حال کې د خپلو پرېکړو په عملي کېدو ټینګار کوي، چې د دوی د شویو پرېکړو په وړاندې پراخه نړیوال غبرګونه راپارېدلي او تر اوسه هیڅ کوم هیواد د طالبانو نظام په رسمیت نه دی پېژندلی.