عبدالله

د سولې خبرو دویم پړاو به په ټاکلې نېټه او قطر کې تر سره شي

اطلاعات روز: د ملي پخلاینې عالي شورا مشر عبدالله عبدالله وایي، د سولې دویم پړاو خبرې به په ټاکې نېټه (د مرغومې ۱۶مه) په قطر هېواد کې پیل شي.

د ملي روغې جوړې عالي شورا په خپره کړې خبرپاڼه کې راغلي، چې ښاغلي عبدالله نن (یکشنبه، ۷ مرغومې) په سپېدار ماڼۍ کې د یادې شورا د رهبرۍ کمېټې د دویمې ناستې په دویمه ورځ ویلي، چې قطر هېواد د کرونا په کړکېچن حالت کې د افغان سولې دویم پړاو خبرو ته تیاری ښودلی دی.

د ښاغلي عبدالله په وینا، «قطر د سولې خبرو اترو د لومړي پړاو کوربتوب په غاړه لاره، د سولې خبرو اترو د ملاتړ کوونکي هېواد په توګه یې د دویم پړاو خبرو اترو کوربتوب ته د کوېډ ۱۹ په بحراني حالت کې تیاری وښوده او له دې خبرو یې ملاتړ وکړ.»

په دې ناسته کې دغه راز ګډونوالو د ژر اوربند د اړتیا ترڅنګ په ځینو نورو مهمو مواردو هم خبرې کړې دي.

دغه راز پرېکړه شوې چې قطر ته د مرکچي پلاوي له تګ وړاندې یوه تخنیکي ډله رامنځته شي، څو د افغانستان اسلامي جمهوریت لومړیتوبونه برابر او جوړ کړي او د رهبرۍ کمېټې له منلو وروسته پرې مرکچي پلاوی د ملاتړیز لارښود په توګه عمل وکړي.

د خبرپاڼې په وینا، «په خبرو اترو کې د لومړیتوبونو پر ټاکلو، په فکري او رواني ډول د مرکچي پلاوي پر ډاډه کولو، د ملي اجماع د روحیې پر پیاوړي کولو، د سولې داعیې پر ټولشموله کولو، د ژر اوربند په په ضرورت، د بې ګناه افغانانو د وژنې او وینې توېدنې پر ژر درېدو، د افغانانو په اساسي حقونو او د بیان پر ازادۍ بحث او د نظرونو تبادله وکړه.»

دا په داسې حال کې ده چې له دې وړاندې حکومتي لوړپوړو چارواکو ویلي و چې د افغان سولې دویم پړاو خبرې دې په کور دننه افغانستان کې تر سره شي.

خو کابل کې یوې غونډه کې د ملي پخلاینې عالي شورا مشر عبدالله عبدالله ویلي و چې دویم پړاو خبرو ته د ځای ټاکنه باید دا خبرې له خنډ او ځنډ سره مخ نه کړي.

که څه هم د المان او ناروې په ګډون ځینو نورو هېوادونو هم د افغان سولې خبرو کوربه توب ته سینه ډبولې ده، خو اوس ملي پخلاینې شورا د دویم پړاو خبرو لپاره بیا هم قطر هېواد وټاکه.