اطلاعات روز: د افغانستان د صرافانو سراسري شورا مشر میرافغان ساپي پرون اطلاعات روز ته وویل، چې صرافان به خپل کاري اعتصاب پای ته ورسوي او د صرافۍ ټول مارکیټونه به پرانیستل شي.
ښاغلي ساپي دغه خبرې پرون (یکشنبه، ۴ د کب) ولسمشر محمد اشرف غني سره د دوی او دغه راز د افغانستان بانک له مشرتابه سره له لېدني وروسته وکړې.
دغه لیدنه چې د صرافانو د ستونزو او غوښتنو اورېدنې لپاره جوړه شوې وه، د صرافانو سراسري شورا مشر میرافغان ساپي وویل چې دوی خپل کاري اعتصاب پای ته رسولی او ټینګار یې وکړ چې که ولسمشر غني خپل ژمنې عملي نه کړي، کاري اعتصاب به له سره پیل کړي.
صرافانو له دوو اونیو ډېر وخت کیږي چې له انفرادي جوازونو شرکتي جوازونو ته د اوښتو غبرګون کې کاري اعتصاب کړی دی.
خو د ارګ خبرپاڼه وایي، چې ښاغلي ساپي په یاده غونډه کې ویلي چې صرافان انفرادي جوازونه تمدیدوي او له ولسمشره یې وغوښتل چې انفرادي او شرکتي جوازونونو ترلاسه کول باید اختیاري شي.
خبرپاڼه زیاتوي، په دې ناسته کې صرافانو له هیواده بهر د پیسو لېږد په اړه خپلې ستونزې مطرح کړې ویې ویل، صرافان د امنیتي ستونزو، د برېښنا امکاناتو د کموالي او انټرنیټ ته د نه لاسرسي له امله نه شي کولی خپل انفرادي جوازونه پر شرکتي جوازونو بدل کړي.
خو په دې غونډه کې د افغانستان بانک سرپرست اجمل احمدي بیا ټینګار وکړ چې د پیسو وینځلو او تروریزم د تمویل ضد مبارزې قانون باید تطبیق شي.
د خبرپاڼې پر بنسټ: «نوموړي صرافانو ته د افغانستان بانک له لوري د برابرو شویو اسانتیاوو په اړه معلومات ورکړل او ټینګار یې وکړ چې صرافان باید خپل شرکتي جوازونه واخلي او موږ چمتو یوو په دې برخه کې دوی ته لازیاتې اسانتیاوې برابرې کړو.»
دغه راز د افغانستان بانک سرپرست ویلي، که چېرې انفرادي جوازونه تمدید شي اندېښنه شته چې ستونزه دوام ومومي او په بنسټیزه توګه حل نه شي. په دې غونډه کې د مالیې وزارت چارسمبالي محمد خالد پایند هم ګډون کړی و چې د صرافانو د ستونزو حل ژمنه یې وکړه.
ولسمشر محمد اشرف غني د صرفانو ستونزو اورېدو وروسته ویلي، چې لویه څارنوالي دې په ممکنه ژر فرصت د پېسو لېږد برخه کې د صرافانو ستونزه حل کړي. ښاغلي غني ټینګار کړی چې باید په یوه اونۍ کې خواوې د اصولو پر بنست پایلې ته ورسیږي.
د خبرپاڼې په وینا، ولسمشر د افغانستان بانک او صرافانو اتحادیې له مسوولینو وغوښتل چې د یادې ستونزې حل لپاره ټاکلي وړاندیزونه، وړاندې کړي.