اتمر

د افغان سولې له بل پړاو خبرو د ترکیې کوربه توب؛ د اتمر او اوغلو د خبرو اترو محور

اطلاعات روز: د هېواد بهرنیو چارو وزیر محمدحنیف اتمر د ترکیې بهرنیو چارو وزیر داود چاوش اوغلو سره په یوې ټیلیفوني اړیکه کې، ترکیه کې د افغان سولې په اړه جوړېدونکې ناستې په اړه خبرې کړې دي.

د بهرنیو چارو وزارت نن (یکشنبه، ۲۴ د کب) د یوې خبرپاڼې په خپرولو سره ویلي چې ښاغلي اتمر په دې اړیکه کې له ترکیې د «باور وړ» هېواد په توګه د افغان سولې دویم پړاو خبرو د کوربه توبه له تیاري ستاینه کړې ده.

نوموړي دغه راز له خپل ترکي سیال سره خبرو کې، د دې ناستې په اړه د کار تګلارې، ګډونوالو او پایلو په اړه پر اړیکو او مشورو ټینګار کړی دی. د هیواد بهرنیو چارو وزیر ویلي چې هیله کیږي د ترکیې دغه ناسته د اوربند ټینګښت او د خلکو ارادې سره سم د یوې سیاسي حللارې ته رسېدو برخه کې د وړاندې تګ یو ګام وي.

د ترکیې بهرنیو چارو وزیر ویلي چې د ترکیې ناسته به ځایناستې نه، بلکې ټوله به د دوحې سولې لړۍ وي. هغه زیاته کړې چې ډېری ښکېلو خواوو د ترکیې ناسته کې د ګډون لپاره د تیارو خبره کړې ده.

د بهرنیو چارو وزارت ویلي چې د افغانستان او ترکیې بهرنیو چارو وزیرانو په دې ټیلیفوني خبرو کې دغه رزا د دوه اړخیزه اړیکو پر پراختیا، د اړیکو پر پیاوړتیا او په څو اړخیزو همکاریو خبرې کړي دي.

دغه راز د دې وزارت د خبرپاڼې له مخې، د اسیا زړه هېوادونو – استانبول لړۍ ناسته چې ټاکل شوې د روان کال د مارچ په وروستیو کې د تاجکستان پلازمېنې دوشنبې ښار کې ترسره شي، هم د دې خبرو د بحث موضوع وه.

ښاغلي اتمر دغه ناسته د سولې دویم پړاو خبرو د سلا مشورو او تیاریو لپاره یو ښه فرصت بللی دی.