عبدالله او کرزی

د ملي پخلایني عالي شورا مشر افغان سولې اړوند جوړېدونکې ناستې لپاره مسکو ته روان شو

اطلاعات روز: د ملي پخلاینې عالي شورا وایي، د دې شورا مشر عبدالله عبدالله د یو لوړپوړي پلاوي په مشرۍ په روسیې کې د افغان سولې اړوند جوړېدونکې ناسته کې د ګډون لپاره مسکو ته روان شو.

د ملي روغې جوړې عالي شورا د یو اعلامیې په خپرولو سره ویلي، چې ښاغلی عبدالله نن (چهارشنبه، ۲۷ د کب) په مسکو کې د افغان سولې په تړاو د «ترویکا» د غړو هېوادونو په نوښت جوړ شوي کنفرانس کې د ګډون لپاره فدراتیف روسیې ته روان شو.

اعلامیه وایي: «د ملي مصالحې عالي شورا رییس د فدراتیف روسیې په رسمي بلنه د افغان سولې څخه د ملاتړ په موخه جوړه شوې ناسته کې د افغانستان اسلامي جمهوریت په استازولۍ ګډون او خبرې کوي.»

د ملي پخلاینې عالي شورا وایي، د افغان سولې په تړاو د مسکو کنفرانس سبا  د مارچ په ۱۸ یا د روانې کب میاشتې په ۲۸مه نېټه د ترویکا غړو هېوادنو له خوا په مسکو کې د فدراتیف روسیې په کوربتوب جوړیږي.

دغې شورا ویلي، په دې ناسته کې به د سولې خبرو چټکېدو او د دوحې خبرو اترو پر تقویت سربېره نورو خبرو هم بحث او نظرونه شریک شي. اعلامیه کاږي: «په دې یو ورځني کنفرانس کې د افغانستان اسلامي جمهوریت رهبران او استازي او د طالبانو د تحریک استازي ګډون کوي، چې د سولې خبرو اترو په چټکېدو، د دوحې د خبرو اترو پر تقویت، د تاوتریخوالي پر کمېدو، د یو خپلواک، په خپل ځان بسیا او له تروریزم څخه پر پاک افغانستان به بحث او د نظرونو تبادله وکړي.»

اعلامیه کاږي چې ښاغلي عبدالله افغان سولې برخه کې دغه ناسته او د روسیې په ګډون د سیمې هېوادونو رول مهم یاد کړی.

د یادې شورا د اعلامیې له مخې ډاکټر عبدالله عبدالله د خپلو خبرو په دوام ویلي: «د مسکو ناسته په دوحه کې د سولې خبرو اترو څخه د ملاتړ او د ترکیې ناستې ته د زمینه سازۍ په موخه جوړیږي، افغانستان د ترویکا غړو هېوادونو له خوا په افغانستان کې د سولې ټنګښت په برخه کې له همکارۍ هرکلی کوي.»

قطر کې د طالبانو سیاسي دفتر هم ویلي، چې په دې ناسته کې ګډون کوي.

روسیې هېواد څو ورځې وړاندې افغان حکومت، د افغانستان ځینو سیاسي څېرو او طالبانو ته بلنه ورکړه چې په دې هېواد کې افغان سولې په اړه جوړېدونکې ناسته کې ګډون وکړي.

همدارنګه روسیې په دې ناسته کې د سیمې هېوادونو له هغې ډلې چین او پاکستان او دغه راز امریکا ته د ګډون بلنه ورکړې. د امریکا بهرنیو چارو وزارت پرون وویلې چې په دې ناسته کې به د دې هېواد په استازيتوب افغان سولې لپاره د امریکا ځانګړی استازی زلمی خلیلزاد ګډون کوي.