رحماني

د ولسي جرګې مشر: فاریاب کې حاکم وضعیت ترهګریزو فعالیتونو ته زمینه برابروي

اطلاعات روز: د ولسي جرګې مشر میررحمان رحماني وایي، فاریاب ولایت کې د دې ولایت نوي والي پر ضد لاریونونه او وروستي ګامونه به ترهګریزو فعالیتونو ته زمینه برابره کړي.

د ولسي جرګې مشر نن (دوشنبه، ۳ د غبرګولي) د فاریاب ولایت حالت د اندېښنې وړ یاد کړ او زیاته یې کړه چې د دې ولایت د ځینو ولسوالیو د سقوط شونتیا به په اوسني حاکم وضعیت پورې تړلي وي.

ښاغلي رحماني وویل: «د فاریاب حالت د اندېښنې دی، دا کار د دښمن پر ژرنده اوبه ورپرېږدي او ترهګریزو فعالیتونو ته به زمینه برابره کړي. په دې ولایت کې د ولسوالیو سقوط شونتیا دې ولایت کې حاکم حالت پورې تړاو لري.»

میررحمان رحماني پر حکومت او د فاریاب قضیه کې دخیلو سیاسیونو غږ وکړ، چې هر څه ژر باید دې ستونزې ته حللاره ومومي.

دا په داسې حال کې ده چې تېره ورځ په فاریاب ولایت کې د دې ولایت لپاره د نوي والي محمدداود لغماني پر ضد د لاریونونو دوام کې، د دوی په خوښه والي لپاره ټاکنې وکړې.

په دې ټاکنو کې څلور تنه چې هویت یې لا څرګند شوی نه دی، رایې ورکړې. د افغانستان اسلامي جنبش ګوند د ځوانانو کمېټې مسوول احسان الله قوانچ پرون اطلاعات روز ته وویلې، چې په دې ټاکنو سره یې واک د یاد ګوند مشر مارشال عبدالرشید دوستم ته ورکړی او هیله لري چې مرکزي حکومت د نوموړي غوښتنه ومني.

نوموړي خبرداری ورکړ که حکومت یې غوښتنه ونه مني، دوی به د خپلو لاریونونو لمنه پراخه او د هېواد شمال او شمال ختیځو سیمو ته به یې وغځوي.

له دې وړاندې د دغه ګوند پلویانو دا خبرداری هم ورکړی و، چې که مرکزي حکومت یې غوښتنه و نه مني، هغوی ځان ته دولت جوړوي.

محمد داود لغماني لس ورځې وړاندې د ولسمشر محمداشرف غني په حکم د فاریاب نوي والي په توګه د دې ولایت مېمنې ښار د پوځ لوا مقر کې کار پیل کړ. د نوموړي د ټاکل کېدو او بیا پېژندلو سره سم، د فاریاب خلکو او د عبدالرشید دوستم په مشرۍ د افغانستان اسلامي جنبش ګوند پلویانو د ښاغلي لغماني پر ضد خپل اعتراضونه پیل کړل.

دغه لاریونوال غواړي چې والیان، ښاروالان او ولسوالان د خلکو په خوښه وګمارل شي.