لغمان

د لغمان ولایتي اداره: طالبانو د یوې مېرمنې په ګډون د یوې کورنۍ درې تنه وژلي

اطلاعات روز: د لغمان ولایتي مسوولین ادعا کوي چې طالبان د دې ولایت مرکز مهترلام کې د ملکي وګړو یو کور ته اووښتي او د یوې مېرمنې په ګډون یې د دې کورنۍ درې تنه وژلي او څلور نور یې ټپیان کړي دي.

د لغمان د والي ویاند اسدالله دولتزي نن (چهارشنبه، ۶ د زمري) اطلاعات روز ورځپاڼې ته وویل، تېره شپه وسله وال طالبانو شاوخوا لس بجې د دې ولایت مرکز مهترلام اړوند «قوال‌خیلو» سیمه کې د اکرام په نوم د یوه ملکي وګړي کور ته وراوښتي، چې پرمهال یې د یادې کورنۍ د یوې میرمنې په ګډون درې تنه وژل شوي او څلور نور ټپیان شوي دي.

دولتزی وايي، سیمې ته په وخت امنیتي ځواکونه رسیدلي چې پرمهال یې د وسله والو طالبانو د سرګروپ شاه‌اغا په ګډون درې وسله وال وژلي دي او ځینې نورو یې له سیمې په تیښته بریالي شوي دي.

دولتزي زیاته کړه: «تېره شپه شاوخوا لس بجې وسله والو طالبانو د لغمان ولايت مرکز اړوند قوال خېلو سیمه کې د اکرام په نوم د يوه ملکي وګړي کور ته وراوښتي چې پرمهال یې نښته رامنځته شوې، د نښتې په ترڅ کې یوه ميرمن او دوه زامن یي وژل شوي او د انګور په ګډون یې څلور لمسيان ټپیان شوي. دغه راز نوموړي سيمې ته د امنيتي ځواکونو د رسيدو سره سم د نښتي له امله د ترهګرو طالبانو سرګروپ شاه آغا مشهور په بدرالدین په ګډون درې تنه وژل شوي.»

وسله والو طالبانو تراوسه په دې اړه څه نه دي ویلي.