خلیلزاد

خلیلزاد : تېرو دریو ورځو کې له ۲۵۰ ډېر بهرني وګړي له کابله بهر شوي

اطلاعات روز: د افغانستان د سولې  لپاره د امریکا ځانګړی استازی زلمی خلیلزاد وايي، په تیرو دریو ورځو کې له ۲۵۰ ډېر بهرني وګړي د قطر الوتنو له لارې له کابله ویستل شوي دي.

هغه نن سهار ( شنبه، ۲۰ د وږي ) په یو ټویټ کې ویلي چې په دې کسانو کې لسګونه امریکایان هم شامل دي چې دوی د طالبانو له کوم خنډ پرته کابل پرېښی دی.

زلمي خلیل زاد د قطر هیواد څخه د دې الوتنو د اسانتیاوو ستاینه او په دې برخه کې یې د طالبانو له همکارۍ هرکلی کړی دی.

هغه دا هم ویلي چې امریکا د قطر دولت، طالبانو او نورو سره خبرو ته دوام ورکوي، تر څو د بهرنیو وګړو په ځانګړې توګه امریکایانو او هغه افغانان چې هیواد پریږدي د وتلو خونديتوب ډاډ ترلاسه کړي.  

د دې کسانو لومړۍ ډلې د تیري اونې په پنج‌شنبې کابل پرېښوده. په هغه ورځ د قطر رالیږل شوي ځانګړي استازي، مطلق بن القحطاني په هوايي ډګر کې جوړې شوې خبري ناسته کې وویل، د کابل هوايي ډګر بهرني الوتنو ته چمتو شوی دی.

هغه ټینګار وکړ چې دا ورځ د افغانستان لپاره تاریخي ورځ ده.

تیره ورځ هم د بهرنیو وګړو د لیږد بهیر دوام درلود.

دا وګړي د زمري په ۲۴مه له کابله د وتلو له لړۍ او پر دې ښار د طالبانو تر ولکې وروسته، ګیر پاتې ول. اوس هم سلګونه هغه افغانان چې بهرنیانو سره یې تېرو ۲۰ کلونو کې کار کړی و، پاتې دي.

د کابل د تخلیې په بهیر کې چې د وږي تر ۹مه یې دوام درلود، نږدې ۱۲۰ زره کسان له افغانستانه وتلي دي.