پکتیا

د اقتصادي ستونزو ډېرېدل؛ ګردېز کې دوو تنو ځان‌وژنه کړې

اطلاعات روز: د پکتيا ولايت مرکز ګردېز اړوند دولتزويو او باغکې سيمو کې دوو تنو ځان وژنه کړې، ځايي خلکو يې لامل اقتصادي ستونزې بللې دي.

ځایي سرچینې وایي، نن (دوشنبه، ۲۹ د وږي) سهار مهال لومړی پېښه د دولتزويو سيمې په غونډۍ کلي کې شوې. د دې سيمې يو تن اوسېدونکي چې د نوم له څرګندولو يې ډډه کوله اطلاعات روز ته وويل، د صديق الله په نوم يو ځوان له هغه وروسته ځان په دار کړی، چې د اقتصادي ستونزو له امله يې د خوراکي توکو د رانيولو توان نه درلود.

د ځان وژنې دویمه پېښه په باغکې سيمه کې رامنځته شوې. هلته هم يو کس ځان وژنه کړې، خو د لامل په اړه يې تر اوسه مالومات نه دي ورکړل شوي. طالبان هم په دولتزيو سيمه کې د رامنځته شوې پېښې پخلی کوي.

په دې اړه د پکتيا ولايت د اطلاعاتو او کلتور ريس خالقيار احمدزي اطلاعات روز ته وويل، چې د صديق الله په نوم ځوان په نشه يي توکو روږدی و او په تېر نظام کې يې د ملي پوليسو په ليکو کې هم دنده ترسره کړې وه.  نوموړي دا تر اوسه نه دی تاييد کړې، چې ياد کس اقتصادي ستونزې هم درلودې او کنه.

دا په داسې حال کې ده، چې د هيواد د ځينو نورو ولايتونو په څېر پکتيا کې هم خلک د خوراکي او سون توکو د بيو له لوړوالي سر ټکوي. ورسره بیا په ټول هېواد کې ډېری خلک بې‌کاره شوي هم دي.