د امریکا دفاع وزارت: افغانستان کې هوایي بریدونو لپاره طالبانو سره همغږۍ ته اړتیا نه لرو

اطلاعات روز: د امریکا متحده ایالاتو د فاع وزارت (پنتاګون) ویاند جان اف کربي ویلي، چې د دې هېواد نظامیان افغانستان کې پر داعش او القاعدې د بریدونو ترسره کولو لپاره، په بشپړ واک کار کوي.

ښاغلي کربي دا موضوع تېره ورځ (جمعه، د تلې ۲مه) د یوې پوښتنې په ځواب کې چې د افغانستان اسمان د طالبانو د هوایي قلمرو په توګه پیژني، دا مسله راپورته کړه. هغه وویل چې دا مهال په هوایي بریدونو کې له طالبانو سره د همغږۍ اړتیا نشته.

هغه زیاته کړه: «پرته له دې چې د هوایي بریدونو په اړه توضیحات ورکړم ، زه باید ووایم چې دا مهال له طالبانو سره همغږۍ ته اړتیا نشته او زه خیال هم نشم کولی چې په راتلونکي کې به د ترهګرۍ ضد بریدونه د دوی په اجازې پورې اړه ولري.»

کربي دا هم وویل چې متحده ایالات د ترهګرۍ ضد عملیاتو بشپړ واک ساتي او په راتلونکي کې د خپلو وړتیاوو په ساتلو باوري دی.

دا څرګندونې د متحده ایالاتو د دفاع وزارت لخوا په داسې وخت کې شوي چې القاعده چې د راپورونو له مخې بیرته راژوندۍ شوې، د طالبانو یو له متحدو ډلو بلل کیږي.

د دوحې د لاسلیک شوي تړون‌لیک پر اساس د امریکا او طالبانو ترمنځ  طالبان باید خپلي اړیکې له القاعدې سره پرې کړې وی، خو د ځینو راپورونو پر بنسټ، له هغې ډلې د ملګرو ملتونو راپور وایي چې طالبانو پر دې ژمنې عمل نه دی کړی.

له بلې خوا امریکا په داسې حال کې د هوایي بریدونو ترسره کولو کې پر بشپړ واک ټینګار کوي چې د اګسټ په ۲۸مه کابل کې د دې هېواد هوایي برید کې، لږ تر لږه لس ملکي وګړي چې اووه په کې ماشومان ول، ووژل شول.

امریکا پیل کې ویلي ول چې په دې برید کې یې د داعشیانو په ځانمرګي تورن یو کس موخه ګرځولی، خو وروسته یې وویلې چې برید کې تېروتي او ملکي وګړي په کې وژل شوي دي.