زیتون

ننګرهار کې سږکال د زیتونو حاصلات ۳۰ سلنه زیات اټکل شوي

اطلاعات روز: د ننګرهار کانال رياست چارواکي وايي، اټکل يې کړی چې سږکال به د دغه ولايت د زيتونو له باغونو څخه ۸۶۵ ټنه د زيتونو دانې راټولې کړي چې دا د تېر کال په پرتله ۳۰ سلنه زياتوالی ښيي.

د ننګرهار کانال رياست وياند سید همايون غريبمل اطلاعات روز ورځپاڼې سره په خبرو کې وویل، چې تېر کال د زيتونو باغونو ته ځانګړې پاملرنه شوې او همدا لامل دی چې سږکال به یې حاصلات لوړ وي.

د ښاغلي غریبمل په وينا، د دغو زيتونو له ۱۰ ټنه څخه يې اچار جوړېږي او پاتې ۸۵۵ ټنه څخه به د زيتون تېل توليد شي.

سید همایون غریبمل زیاته کړه: «سږکال به د ننګرهار د کانال ریاست اړوند د زیتونو له باغونو څخه ۸۶۵ ټنه زیتون حاصلات ترلاسه کړي، چې دا حاصلات د تیرو شلو کلونو په پرتله په بیساري ډول زیات دي یعنې تیر کال پنځه سوه ټنه حاصلات و، خو سږکال به یې حاصلات د تیر کال په پرتله ۳۰ سلنه زیات وي او د حاصلاتو د زیاتوالي لامل یې د زیتونو د باغونو ښه پالنه ده.»

نوموړی وایي، د ننګرهار زيتون د سيمې په کچه د کيفيت له اړخه ځانګړی نوم لري چې هر کال ترې د پام وړ عوايد تر لاسه کېږي.

د ښاغلي غریبمل په وينا، د دغو زيتونو له ۱۰ ټنه څخه يې اچار جوړېږي او پاتې ۸۵۵ ټنه څخه به د زيتون تېل توليد شي.

غریبمل اطلاعات روز ورځپاڼې ته وویل، په تېرو درېيو لسيزو کې د کورنيو جګړو له امله د کانال اړوند په ۱۳۸۰ هکټاره ځمکه د زیتونو باغونه تخریب شوي وو، خو لا هم د کانال اړوند ۱۷۰۰ هکتاره ځمکه باندې زيتون ولاړ دي.

سید همایون غریبمل زیاته کړه: «د کانال اړوند د زیتونو له باغونو یې نیمایي د جګړو پر مهال تخریب شوي یعنې ویلی شو چې په ۱۳۸۰ هکټاره ځمکه د زیتونو باغونه تخریب شوي، خو لا هم د کانال ریاست اړوند په ۱۷۰۰ هکټاره ځمکه باندې زیتون شتون لري او په دې باغونو کې سلګونه کسان په کار بوخت دي او دوی ته د کار کولو زمینه هم برابره شوې ده.»

د زيتونو په فارمونو کې په کار بوخت کارګر نور احمد اطلاعات روز ورځپانې ته وویل، که د اړتیا وړ وسایل ورکړل شي تمه لري، چې حاصلات به یې په راتلونکو کلونو کې له دې هم لوړ وي.

د هغه په وینا باغونه خوندي نه دي او د ناسم پوهاوي په وجه ځينې مال څروونکي او ماشومان د زيتونو د ونو ښاخونه د خاشاکو او د مالونو د خوړلو په خاطر راماتوي.

د زيتونو په فارمونو کې په کار بوخت کارګر نور احمد اطلاعات روز ورځپانې ته وویل، که د اړتیا وړ وسایل ورکړل شي تمه لري، چې حاصلات به یې په راتلونکو کلونو کې له دې هم لوړ وي.

نور احمد زیاته کړه: «که چیرې د طالبانو شته نظام د کانال ریاست اړوند ځمکو کې د زیتونو ونو ته ځانګړې پاملرنه وکړي او مونږ ته ځانګړي وسایل په واک کې راکړي نو تمه مو دا ده چې هر کال به د زیتونو حاصلات زیاتیږي او دې برخه کې به شته ستونزې حل شي او د دې تر څنګ ځینو ساحو کې د زیتونو ونې د ځایي خلکو له لوري وهل کیږي او له همدې امله د زیتونو ونو ته زیان اوړي.»

په ننګرهار کې د زيتونو د توليد فابريکه چې د همدغو باغونو له جوړېدو سره يو ځای جوړه شوې د معلوماتو له مخې، پخوا په دې کارځای کې ۱۵۰۰ کسان پر کار بوخت و، خو اوس دا کچه تر پنځوس کسانو راټيټه شوې ده.