د ګچو استخراج

ننګرهار کې له اوږده ځنډ وروسته د ګچو کانونو کېندنه پیل شوې

اطلاعات روز: د ننګرهار په خوږیاڼو ولسوالۍ کې له اوږده ځنډ وروسته د ګچو د کانونو استخراج پیل شوی دی.

د ننګرهار د کانونو ریاست چارواکي وایي، په یاده سیمه کې یې د ګچو د دریو کانونو قراردادونه له کورنیو شرکتونو سره کړي، چې له مخې به یې په مسلکي ډول استخراج شي.

د دغه ولایت د کانونو رییس حاجي بازمحمد عبدالرحمن نن (پنجشنبه، ۴ د لیندۍ) اطلاعات روز ورځپاڼې ته وویل، چې د یادو کانونو استخراج یې د خوږیاڼو په «ټاټنګ» سیمه کې پیل کړی دی.

د نوموړي په خبره په دې سره به د سیمې زرګونه خلکو ته د کار زمینه برابره شي.

بازمحمد زیاته کړه: «د ننګرهار خوږیاڼو ولسوالۍ کې مونږ نن د ګچو د ۳ کانونو قرارداد داخلي شرکتونو ته ورکړ، چې په مسلکي ډول به دا کانونه استخراج شي او هم به د سیمې زرګونه خلکو ته د کار زمینه برابره شي، لا هڅه کوو دې برخه کې کار وکړو.»

د کانونو رییس وایي، په دې ولایت کې یې د معدنونو د استخراج د قراردادونو په برخه کې اسانتیاوې برابرې کړي دي او هم یې ننګرهار کې د کانونو د غیر مسلکي استخراج مخه نیولې ده.

عبدالرحمن زیاته کړه: «د طالبانو د حکومت په رامنځته کیدو سره مونږ د کانونو د استخراج په برخه کې قراردادونو ورکړه اسانه کړې او همدا لامل دی چې پانګوال هم زړه ښه کوي چې دې برخه کې پانګونه وکړي او هم مونږ ننګرهار کې د کانونو د غیر قانوني استرج مخه نیولې ده.»

په همدې حال کې د ګچو د کانونو قرادادکوونکي هم خوښ دي چې د قراردادونو په برخه کې ورته حکومت اسانتیاوې رامنځته کړي دي.

قاري مطیع الله د ګچو د کانونو یو تن قرارداد کوونکی دی هغه اطلاعات روز ورځپاڼې سره په خبرو کې وویل، د دې کانونو په استخراج سره به زرګونه خلکو ته د کار زمینه برابره شي او هم له طالب چارواکو وغوښتل چې سوداګرو ته دې د کانونو د استخراج په برخه کې لا اسانتیاوې برابرې کړي.

قرارارداد کوونکی قاري مطیع الله زیاته کړه: «پخوا مونږ د کانونو د قرارداد په برخه کې له زیاتو ستونزو سره مخ وو، خو د طالبانو د حکومت په راتګ سره دا چاره اسانه شوې ده مونږ له حکومت غواړو چې دې برخه کې نورې اسانتیاوې هم برابرې کړي.»

ننګرهار کې د ګچو د استخراج په قانوني ډول  داسې مهال پیلیږي چې تر دې وړاندې د دې په یو شمیر ولسوالیو کې د شوکاڼي استخراج هم په قانوني ډول پیل شوی دی.