اطلاعات روز: لغمان کې خبریالان وایي، اطلاعاتو ته لاسرسی اسان شوی دی، اوس ورسره طالب چارواکي د معلوماتو ورکړه کې مرسته کوي.
لغمان لپاره د طالبانو والي ذینالعابدینعابد د ختيځ زون خبریالانو سره د همغږۍ ناستې کې چې د بېلابیلو رسنیو استازو په کې برخه لرله ډاډ ورکړ، چې د رسنیو د فعالیت پر وړاندې یې ګڼ شمېر اسانتیاوې رامنځ ته کړي او خبریالان کولی شي، چې په ډاډه زړه پدې ولایت کې خپل رسنیز فعالیتونه ترسره کړي.
عابد پدې ناسته کې له خبریالانو هم وغوښتل، چې ولایتي ادارې سره دې خپله همکاري جاري وساتي.
والي زیاته کړه:« د لغمان ولایتي اداره له خبریالانو سره پوره همغږي لري له دوی سره مو له پیل راهیسې اړېکې ښې دي او هم مو ټولو دولتي ادارو ته مکتوب استولی چې له خبریالانو سره په وخت همکاري وکړي او هڅه کوو، چې خبریالانو ته اطلاعاتو ته د لاسرسي برخه کې لا نورې اسانتیاوې هم برابرې کړو او هم له خبریالانو غواړو چې خپله همکاري جاري وساتي.»
خبریال عبید الله بیدار اطلاعات روز ورځپاڼې ته وویل، چې د تېر په پرتله اطلاعاتو ته لاس رسی اسان شوی او پر وړاندې یې کومې جدي ستونزې نشته.
بیدار زیاته کړه:«د لغمان په ولایت کې خبریالانو سره د ولایتي چارواکو اړیکې ډیرې ښې دي، په خپل وخت معلومات ورکوي او مونږ تراوسه پورې ددغه ولایت په کاري ساحه کې له کومې ستونزې سره نه یو مخ شوي او همدارنګه مونږ ځان ډاډمن احساسوو.»
یو بل خبریال ایمل ظاهر په ورته وخت کې له نورو مسوولینو هم غواړي، چې د دوئ پر مخ شته ستونزې دې حل او د رسنیز فعالیت په سرته رسولو کې دې اسانیتاوې زیاتې کړي.
نوموړی وايي په دې ولایت کې ترپخوا اطلاعاتو ته د لاسرسي په برخه کې ستونزې حل شوي او له ختیځي سیمي د نورو ولایتونو له مسولینو يې هم غوښتنه دا ده ، چې د لغمان د والي لار دې تعقیب کړي.
ظاهر زیاتوي:«د خبریالانو غوښتنه د طالبانو له نورو چارواکو هم دا ده، لکه څرنګه چې لغمان کې دوئ له رسنیو سره د مالوماتو په ورکړه کې همکاري کوي، دا ډول همکاري او اطلاعاتو ته لاسرسی دې په نورو ولایتونو کې پیدا شي څو خبریالان وکولای شي ځان خوندي احساس کړي.»
دا په داسې حال ک ده چې لاهم په ختیځ کې خبریال معلوماتو ته د لاسرسي په برخه کې له ستونزو سره مخ دي او غواړي، چې د حل لپاره یې هڅې چټکې شي.