د ایران د بهرنیو چارو وزارت، په کابل کې د ایران پر سفارت او په هرات کې یې پر کونسلګرۍ د بریدونو په اړه سخته نیوکه کړې او په تهران کې یې د افغانستان د سفارت سرپرست احضار کړی دی.
د ایران د بهرنیو چارو وزارت د خبر پاڼې له قوله، ددغه وزارت د سویلي اسیا د چارو عمومي مشر د ډیپلوماتیکو ماموریتونو د امنیت تامین د دولتونو مسوولیت یاد کړی او د ایران پر استازولیو د برید کوونکو پر وړاندې یې د قانوني چلند غوښتنه کړې.
همدارنګه د ایران د بهرنیو چارو وزارت د سویلي اسیا عمومي رییس د افغانستان د سفارت شارژدافیر ته خبر ورکړی چې په افغانستان کې د ایران استازولیو کونسلي برخو تر بلې خبرتیا پورې خپل فعالیت درولی تر څو د افغانستان له لوري د ایران د استازولیو د امنیت ډاډ ترلاسه شي. په تهران کې د افغانستان د سفارت شارژدافیر د پخواني حکومت ډیپلوماټانو څخه دی چې اوس مهال د طالبانو د بهرنیو چارو له وزارت څخه هدایت اخلي.
په ایران کې د افغان کډوالو سره د زور زیاتي ډکې ویډیوګانو او انځورونو په غبرګون کې یو شمېر افغانانو پرون (دوشنبه، ۲۲ د وري) کابل او هرات کې د ایران سفارت او کونسلګرۍ مخې ته لاریون وکړ.
په هرات کې اعتراض کوونکو د ایران د کونسلګرۍ دروازې ته اور ورته کړ او پر ودانۍ یې ډبرې وویشتلې.
ددغه د لاريون په اړه خپاره شوي عکسونه ښيي چې يو شمېر لاريون کوونکي د ايران کونسلګرۍ د امنيتي کمرو دغیر فعالولو هڅه کوي.
تر دې مخکې د ایران د بهرنیو چارو د وزارت ویاند سعید خطیب زاده، دغو اعتراضونو ته په غبرګون کې ویلي وو چې د دیپلوماتیکو تاسیساتو د امنیت ټینګښت د طالبانو « پریکنده» مسوولیت دی.
هغه په یوه بیانیه کې ټینګار کړی چې: « په هرات او د افغانستان په نورو ښارونو کې د ایران د اسلامي جمهوریت سفارت او کونسلګریو امنیت باید په بشپړه توګه خوندي شي او د دغو استازولیو د خوندي فعالیت لپاره لازم ضمانتونه ورکړل شي.»
په دا وروستیو کې پر خواله رسنیو داسې ویډیي کلیپونه خپاره شوي چې په ایران کې افغان کډوالو سره د ځینې کسانو زور زیاتی ښيي. ددې ویډیو ګانو وخت معلوم ندی، خو له هغه مخکې په ټولنیزو رسنیو کې په پراخه کچه داسې راپورونه خپاره شول چې ایراني چارواکو په مشهد کې پر دریو دیني عالمانو د برید عامل یو بهرنی وګړی اعلان کړ. خو ایراني رسنیو د برید کوونکي د هویت له څرګندولو ډډه کړې ده. خو ویل کیږي چې دغه کس له افغانستان څخه ایران ته داخل شوی دی.
په کابل کې د ایران سفارت د افغان کډوالو سره د ناوړه چلند خبره ردوي او وايي، چې خپاره شوي کلیپونه د دواړو هېوادونو ترمنځ د اړیکو د خرابوالي او په افغاني ټولنه کې «د ایران په هکله د ویرې» را پارولو په مقصد جوړ شوې دي.
طالب چارواکو تر دې مخکې ویلي وو، چې دوی په کابل کې د ایران سفیر د ویډیوګانو په تړاو احضار کړی دی.