اطلاعات روز: د افغانستان بانک ویلي، د ډالرو هغه بانکنوټونه چې نیټه یې له ۱۹۹۶ کال څخه مخکې وي، څېرې شوي، پلستر شوي، خراب شوي او یا یې شکل له منځه تللی وي د افغانستان بانک ته نور د منلو وړ نه دي.
د بانګ دغه پریکړې د ننکرهار صرافان اندېښمن کړي او وايي، چې اوسنیو حالاتو ته په کتو د افغانستان بانک له لوري د زړو ډالرو په تړاو شوې پریکړه پر ځای نه ده او په خبره یې عملي کیدل به يې هم ناوړه پایلې ولري.
په جلال اباد ښار کې د صرافانو اتحادیې مرستیال حاجي غلجي اطلاعات روز ورځپاڼې ته وویل، چې د افغانستان بانک وروستۍ پرېکړه غیر عادلانه او په خبره يې عملي کیدل یې ستونزمن او ناممکن دي.
حاجي غلجی زیاتوي: «کومه پریکړه چې د افغانستان بانک د زړو ډالرو په اړه کړې، دا پریکړه صرافانو ته په زیان تمامیږي دا لویه ستونزه ده، ټول خلک په تشویش کې دي او همدارنګه صرافانو او عامو خلکو ته مالي زیان اوښتی دی.»
نوموړی زیاتوي، د هېواد په کچه د ټولو ولایتونو صرافانو د افغانستان بانک د پرېکړې د عمليکېدو په اړه مخالفت ښودلی او د دې طرحې عمليکېدل له خپل توان څخه لوړ بولي.
یو شمېر نور صرافان بیا له افغانستان بانک نه غوښتنه کوي چې دوی ته دې د ستونزو د رامنځته کیدو پر ځای اسانتیاوې برابرې کړي.
هڅه مو کړه، چې په دې تړاو د افغانستان بانک نظر هم واخلو خو له هڅو سره سره بریالي نه شو.
خو بل لورته د افغانستان بانک ویاند صابر مومند بیا رسنیو ته ویلي دا اقدام دوی د مالي او بانکي خدمتونو د ښه والي په موخه کړی دی.
نوموړي ویلي، چې د ډالرو هغه نوټونه چې تاریخ یې له ۱۹۹۶ کال څخه مخکې وي، څېرې یا پلستر شوي وي، شکل یې له منځه تللی وي یا هم په یو ډول خراب شوي وي او د چېک کولو په وخت کې یې د شمېر ماشین زېګنال ورکړي، د افغانستان بانک ته نور د منلو وړ نه دي.
مومند همداراز زیاتوي چې د ډالرو هغه نوټونه چې تاریخ یې له ۱۹۹۶ څخه وروسته دی، که څه هم زاړه او سولېدلي وي خو مخکېنۍ ویل شوې ځانګړنې و نه لري، په ټولو بانکونو او صرافیو کې د منلو وړ دي.