د هلمند په نادعلي ولسوالۍ کې پر ۷۵۰ کورنيو د ترکيې هېواد مرستې وویشل شوې

اطلاعات روز: هلمند کې د سرې میاشتې مسوولین وایي، د دې ولایت په نادعلي ولسوالۍ کې یې پر ۷۵۰ کورنیو د ترکیې هیواد د خوراکي توکو بستې وویشلې.

هلمند کې د طالبانو د سرې مياشتې ریيس مولوي فضل محمد فضلي وايي، یادې مرستې یې تېره ورځ (جمعه، ۱۳ د غبرګولي) په ناد علي ولسوالۍ کې اړمنو خلکو ته ورسولې.

دفضلي په خبره، په اوسنيو شرايطو کې د نادعلي ولسوالۍ ترڅنګ په ټول هلمند کې خلک مرستو ته اړتيا لري او نړيوالو سازمانونو ته په کار ده چې بې وزلو سره خپلې مرستې دوامداره وساتي.

دی وايي:«په اوسني شرایطو کي ډیری کورنۍ خوراکي مرستو ته سخته اړتیا لري، او دا مرستې هم د ترکيي هیواد له خوا هغو کورنیو ته ورکړل شوې، چي اړمنې وې.»

په هلمند کې د طالبانو د نادعلي ولسوالۍ مرستيال مولوي بدري وايي، چې د کورنيو د سروې پرمهال يې شفافيت ته پاملرنه کړې او د مرسته ترلاسه کوونکو زياته برخه د نادعلي د «دښتي او شنې سيمو» اوسيدونکي دي.

د نادعلي ولسوالۍ هغه اوسیدونکي چي له دې مرستې برخمن شوي د مرستو له ويش څخه خوښ دي او غوښتنه کوي چې په راتلونکي کې دې هم ورسره مرستې وشي.

دوی زياتوي چې دامهال په دغه ولسوالۍ کې لاهم ډير شمير کورنۍ د سخت فقر او غربت سره مخ دي او له مسوولينو غواړي چې په راتلونکي کې هم دغې ولسوالۍ ته ځانګړې پاملرنه وکړي.

په هلمند کې د سرې مياشتې د چارواکو په خبره چې تردې د مخه هم د ترکيې مرستې د سرې میاشتې ریاست له خوا د دې ولایت سلګونه کورنیو ته رسیدلي دي.

د نورو هیوادونو او بشري سازمانونو ترڅنګ ترکیې هیواد هم د افغانستان خلکو سره بشري مرستو ته ملا تړلې او تر دمه یې د هیواد په ډیرو ولایتونو کې اړمنو سره مرستې کړې دي.