د يادو سياليو د پیل په مراسمو کې لوبغاړو او د لوبو نندارچيانو د طالبانو له حکومت څخه غوښتنه وکړه چې د شپږم ټولګي پورته نجونو ته هم اجازه ورکړي چې زده کړې ترسره کړي.
دغه لوبې چې ۸ ورځې دوام کوي ۴ ورځي يې تيرې شوي او څلور ورځې به لاهم نور دوام وکړي.
په دغه ولايت کې د فوټبال فدراسيون مشر ميرزامحمد اميرزی وايي، د لوبو ترسره کيدو څخه يې موخه زده کړو ته د ماشومانو هڅول دی.
هغه وايي، يادې لوبې د يونيسف ادارې په مالي لګښت پېل شوي او د همدې لوبو له لارې به لوبغاړي کورنيو ته پیغام وليږدوي چې خپلې نجونې او هلکان ښوونځيو ته وليږي.
په ورته مهال هغه لوبغاړي چې په يادو سياليو کې ګډون کړی زيات خوشحاله دي او زياتوي چې ورزش د روغ صحت ضامن دی او په کار ده چې ځوانان د بیځايه وخت تيرولو پر ځای ورزش وکړي.
دوه تنه لوبغاړي غوښتنه کوي چې د ماشومانو د زده کړه ترسره کيدو لپاره دې ډيرې هڅي وشي او حکومت اوخلک دې په ګډه ماشومانو ته د زده کړو زمينه برابره کړي.
دا په داسې حال کې ده چې ارزګان کې که څه هم جګړې ختمې شوي خو لاهم لسګونه ښوونځي د زده کوونکو پر مخ تړلي دي چې له امله يې زرګونه زده کوونکي له زده کړو څخه بې برخې دي.