اطلاعات روز: د پکتیا ولایت اریوب ځاځیو ولسوالۍ «سپینې» شګې سیمې ته د لوی اختر په موخه له بېلابېلو ولایتونو ورغلي سیلانیان د طالبانو له ناسمې رویې سرټکوي او وايي، چې په یاده سیمه کې میشت نظامي طالبان او د امربالمعروف کسان سیلانیان دې ته نه پرېږدي چې د خپلې خوښې تفریحي پروګرامونه ترسره کړي.
د سیلانیانو په خبره چې د اختر په دوهمه ځینې ځوانان د امربالمعروف کسانو له خوا په دې تور وډبول شول چې محلي موسیقي یې غږوله.
د پکتیا ولایت د ځاځي اریوب ولسوالۍ یو تن اوسېدونکي میرولي په سیمه کې د ټلیفون له لارې اطلاعات روز سره په خبرو کې وویل، چې له اختر وروسته په تېرو دوو ورځو کې ګڼې داسې پېښې شوي چې طالبانو په موټرو کې د موسیقۍ غږولو له امله ځوانان ښکته کړي او په مرګوني حالت یې ډبولي دي.
هغه وايي: «اریوب ته د چکر لپاره له ټولو ولایتونو لسګونه زره کسان راځي خو طالبانو اوس دومره بد وضعیت له سیلانیانو سره راخیستی چې دې حالت ته په کتو به د بل ځل لپاره څوک دغې سیمې ته د تفریح لپاره زړه ښه نه کړي، ځوانان په دې توهین او یا هم وهل کیږي چې موټر کې یې موسیقي چلانده کړې وي.»
د چکر په موخه یو بل ځوان ولي زوی هم د طالبانو د ناسم چلند په دوام اندېښمن دی هغه وویل، چې تېره ورځ ځینو ماشومانو په سپینې شګې سیمه کې له موسیقي پرته اتڼ کاوه خو یوې ډلې نظامي طالبانو یې نه یوازې مخه ونیوله بلکې په جزايي ډول یې رینجر موټر ته ور واچول او له ځانه سره یې یوړل.
هغه د خپلو لیدلی وضعیت داسې بیانوي: «اریوب ځاځیو ته چې خلک راځي د دې لپاره نه راځي چې طالبان دې ورته کنداغونه ورکړي اریوب د تفریح ځای دی خو مونږ چې د طالبانو دغه وضعیت او سخت دریځ ګورو نو زه ګمان نه کوم چې بیا دې څوک زړه ښه کړي، ځکه څوک چې موټر کې موسیقي غږوي طالبان ورپسې راځي او وهي یې چې ولې دا کار کوې. پرون څو تنو تنکي ځوانانو ه موسیقي پرته اتڼ کاوه خو بیا یې هم هغه ماشومان له اتڼ وګرځول او د رینجر موټر په باډۍ کې یې ځانه سره یوړل.»
سپینې شګې سیمې ته له کندهار، کابل، پکتیکا، خوست، ننګرهار او ګڼو نورو ولایتونو هم سیلانیان ورغلي دي، د پکتیکا ولایت یو اوسېدونکي جاوېد ښرنوال بیا وویل، چې سپینې شګې سیمه سیلانیانو ته د اسانتیاوو برابرېدو په موخه په قرار داد ورکړل شوې خو د نوموړي په وینا چې لاهم سیلانیانو ته کافي امکانات په واک کې نه دي ورکړل شوي او د هټۍ والو له خوا د خوراکي توکو له لوړو بیو یې هم شکایت وکړ.
هغه داسې وویل: «په قرار داد خو ورکړل شوې ولې مونږ چې ګورو له یو څو خېمو پرته بل څه نشته، دوکاندارانو دومره ظلم راخیستی دی چې د HIT په نوم د ۳۰ افغانیو انرژۍ په ۱۰۰ افغانۍ خرڅول کیږي او همدا رنګه د شین چای یو وړوکی ترموز په ۵۰ افغانۍ پلورل کیږي.»
په همدې حال کې بیا د ځاځي اریوب ولسوالۍ لپاره د طالبانو محلي مسوولین له سیلانیانو سره د نظامي طالبانو د ناسم چلند تورونه ردوي او وايي، چې ځینې ځوانان په خورا لوړ اواز موسیقي غږوي او د امربالمعروف کسانو له لوري ورته د نه غږولو توصیه کیږي.
د مالوماتو له مخې په تېرو دریو ورځو کې د اریوب ولسوالۍ سپینې شګې سیمې ته له ګڼو لایتونو تر شاوخوا دوه سوه زره سیلانیان داخل شوي دي. ځايي خلک او ورغلي سیلانیان د طالبانو له حکومت غوښتنه کوي چې یاده سیمه په ملي پارک ونوموي او هلته د سیلانیانو لپاره ټولې اسانتیاوې هم برابرې کړي.