اطلاعات روز: د کندهار په ژړۍ ولسوالۍ کې ځايي سرچینې وایي، په دې ولسوالۍ کې د راوتلو سیلابونو له امله یوه میرمن او د هغې پنځه ماشومان مړه شوي دي.
سرچینې وایي، تېره شپه (چهارشنبه، ۵ د زمري) د کندهار په مرکز، ژړۍ، شاوليکوټ، ميوند، ارغنداب او ځينو نورو ولسواليو کې سېلابونه راوتلي او لا هم د دې ولايت په يو شمېر ولسواليو کې دوام لري.
په دغه ولايت کې د باران موسېسې مشر ډاکټر محمد حقبین اطلاعات روز ته وويل، تېره شپه د ژړۍ په سنځري کلي کې د سېلابونو د راوتو له امله د يوې کورنۍ شپږ غړي مړه شوي دي.
ډاکټر حقبين زیاتوي، چې پر یادو کسانو کور نړېدلی او پکې شته کسانو ژوند بایللی دی.
نوموړی همدا راز وايي، چې په کندهار ښار کې هم د يوې کورنۍ څلور تنه زخميان شوي خو نور کوم چاته زيان نه دی اوښتی.
همدارنګه کندهار کې د طالبانو ځايي مسوولين بیا وايي، تېره شپه سېلابونو يوازي د دغه ولايت په ژړۍ او ارغنداب ولسواليو کې خلکو ته مالي او ځاني زیانونه رسولي دي.
د دوی په خبره، چې د سپين بولدک په ولسوالۍ کې خلک د سیلاب په اوبو کې بند پاتې دي او د ژغورنې له پاره يې کار روان دی.
دغو مسوولینو زیاته کړې، چې سیلابونو نه یوازې ځاني تلفات نه دي اړولي بلکې کرنیزې ځمکې، کورونه او باغونه یې هم له منځه وړي دي.
په همدې حال کې د ژړۍ ولسوالۍ يو تن اوسېدونکی چې نه غواړي نوم يې خپور شي اطلاعات روز ته وويل، د تېرې شپې د سیلابونو له امله د ژړۍ ولسوالۍ په «سنځري» کلي کې شپږ کسان مړه شوي دي.
دی زیاتوي، د سیلابونو راوتو له امله لارې کوڅې بندې دي او خلک لګیا دي د خپلو کورونو اوبه باسي او ورک کسان لټوي.
هغه وویل، لا هم د سېلابونو اوبه روانې دي او په نورو سيمو کې باران شروع دی.
د يادونې وړ ده چې د هوا پيژندنې ادارې د هېواد په يو شمېر ولايتونو کې د سختو ورښتونو او سېلابونه د راوتو خبر ورکړی دی.