انځور: ټولنیزې شبکې (کیهان)

د محرم ویر کوونکو پر وړاندې امنیتي‌ګواښونه؛د کابل لویدیځ کې مخابراتي خدمات قطع شوي

اطلاعات روز: د کابل په لویدیځ کې د امنیتي ګواښونو له زیاتیدو سره په دې سیمه کې له پرون راهیسې مخابراتي خدمتونه قطع شوي دي.

د ځايي اوسېدونکو په وينا، دا مهال په درېيمه، پنځمه او ١٣مه ناحيه کې د ګرځنده مبایلونو انتنونه کار نه کوي.

د دیارلسمې ناحیې یو تن اوسیدونکی وايي، چې له پرون راهیسې د مخابراتي شبکو انتنونه پرې شوې دي.

تر اوسه د دې کار لامل نه دی څرګند شوی.

د مخابراتي شرکتونو له ډلې یې یو وايي، چې د محرم له امله د کابل ښار په لویدیځ کې مخابراتي چوپړتیاوې له تخنیکي ستونزو سره مخ شوي دي.

په دې وروستیو ورځو کې د کابل په لویدیځ د شیعه ګانو ګڼ مېشتو سیمو کې د محرم ویر کوونکو پر وړاندې امنیتي ګواښونه زیات شوي دي.

په دې سیمه کې د طالبانو د امنیتي ځواکونو حضور هم زیات شوی دی. دشت برچي ته ځينې سړکونه تړل شوي دي.

خو په دې وروستیو ورځو کې د کابل لویدیځ د خونړیو بریدونو شاهد دی.

د جمعې او شنبې ورځو کې سرکاریز او پول سوخته سیمو کې دوه چاودنې وشوې. په دغو چاودنو کې لسګونه کسانو ته مرګ ژوبله اوښتې ده.