اطلاعات روز: لمپي سکین یا د پوستکي ناروغۍ چې اوس مهال د سویل ختیځ زون په ځینو ولایتونو کې خوره شوې تر اوس یې په سلګونه غواګانې له منځه وړي دي، چې له دې ډلې یې یوازې له ۱۰۰۰ ډېرې غواګانې په پکتیا ولایت کې مړې کړي او له دې دوه برابره زیات څاروي ورباندې اخته شوي هم دي.
د پکتیا ولایت د کرنې ریاست مسوولین وايي، د پوستکي د ناروغۍ له امله په مرکز ګردېز، سیدکرم او احمد ابا ولسوالیو کې په زیاته کچه څاروي له منځه تللي دي.
په ورته مهال بیا د پکتیا ولایت د څارویو روزونکي د دغې ناروغۍ په پراخېدو اندېښمن دي او وايي، چې اوس مهال په پکتیا کې لسګونه څاروي له منځه تللي دي.
د دوی په وینا چې په دې ولایت کې ډیری خلک په کورونو کې د غواګانو ساتنه کوي، چې له دې لارې ورباندې خپلې اقتصادي اړتیاوې پوره کوي، خو د خواره شوي مرض او د غواګانو د مړینې له کبله خلکو ته مالي زیان رسېدلی دی.
د مرکز ګردېز یو تن اوسېدونکي میلاد احمد اطلاعات روز ته وویل، چې اوس مهال له زرو ډېرې غواګانې مړې شوې او له ۲۰۰۰ څخه زیاتې ورباندې اخته شوې دي.
نوموړی د پکتیا ولایت د کرنې او مالدارۍ له ریاست غوښتنه کوي، چې د پوستکي ناروغۍ د مخنیوي لپاره باید کوټلي ګامونه واخیستل شي او د لا زیاتو تلفاتو مخه دې ونیول شي.
هغه وايي: «مونږ د دغې ناروغۍ له کبله سخت اندېښمن یو، ځکه دا زمونږ د ګټې وټې یوازینۍ سرچینه ده او د ډیرو خلکو غواګانې یې مړې کړې دي، چې تر اوسه یې یې شمېر له ۱۰۰۰ غواګانو اوړي.
زمونږ غوښتنه دا ده، چې د کرنې او مالدارۍ ریاست لاس په کار شي، تر څو د نورو تلفاتو مخه ونیول شي هغه څاروي چې اوس په دې ناروغۍ اخته شوي باید ورته واکسین پیدا او خلکو ته ووېشل شي.»
په ورته مهال د سید کرم ولسوالۍ یوه اوسېدونکي میربازک افغان بیا وویل، چې د دوی په سیمه کې لمپي سکین ته ورته ناروغۍ یوه ښځه هم نیولې ده.
د پکتیا ولایت د کرنې او مالدارۍ ریاست په خپله فیسبوک پاڼه له خلکو غوښتنه کړې، چې څارویو ته له خپلسرو واکسینونو ورکړې ډډه وکړي.
له پکتیا ور هاخوا په خوست او لوګر ولایتونو کې هم دغه ناروغۍ د خپرېدو په حال کې ده، چې په ګڼو سیمو کې یې لسګونه څاروي له منځه وړي او سلګونه نور ورباندې اخته شوي دي.