د هلمند باغران ولسوالۍ کې هیڅ یوه مخابراتي شبکه فعالیت نه لري

اطلاعات روز: د هلمند باغران ولسوالۍ اوسېدونکي وایي، په تېرو شلو کلونو دغه ولسوالۍ کې هیڅ یوې مخابراتي شبکې فعالیت نه دی پېل کړی.

د یادې ولسوالۍ اوسیدونکي زیاتوي، د مخابراتي شبکو د اسانتیا نه شتون له امله له ګڼو ستونزو سره مخ دي او د یوې اړیکې ټینګولو لپاره تر لېرې ځای مزل کوي او بیا اړیکه ټینګوي.

د دوی په خبره، د مخابراتي شبکو نه  فعالیت د دوی پر کارو بار هم ناوړه اغېزه کړې.

د باغران يو اوسيدونکی محمدکريم وايي، چې په تيرو شلو کلونو کې په ياده سيمه کې هيڅ مخابراتي شبکي فعاليت نه دی کړی او خلک يې آن د غرونو سرونو ته د اړیکو ټینګولو لپاره پورته کېږي.

ورته مهال د باغران ولسوالۍ يو بل اوسيدونکی لعل محمد بیا زیاتوي، چې په تيرو وختونو کې د جګړو له امله طالبانو يادې ولسوالۍ کې د مخابراتي شبکو فعاليت ته اجازه نه ورکوله.

هغه وايي، اوس چې جګړې دريدلي په کار ده چې په يادې ولسوالۍ کې هم د نورو ولسواليو په څير مخابراتي خدمتونه فعال شي.

د ده په خبره، د سيمې زيات خلک د مخابراتي شبکو د نشت له امله دپخوانيو ليني تلفونونو او ياهم مخابرو څخه کار اخلي چې دغه چارې دوی ته به کاروبار کې ستونزې جوړې کړي.

هغه د طالبانو له حکومت څخه غوښتنه کوي، چې په يادې ولسوالۍ کې دې خصوصي مخابراتي شرکتونه اړ کړي ترڅو خلکو ته خدمات وړاندې کړي.

بلخوا د باغران لپاره د طالبانو ولسوال ملا جمعه ګل قریشي وایي، په یاده ولسوالۍ کې یې  د مخابراتي شبکو د فعاله کیدو په تړوا د ولایت د  مخابراتو ریاست له مسوولینو سره خبرې  کړې دي، نوموړی هيله څرګندوي چې په نږدې راتلونکي کې به په یاده ولسوالۍ کې مخابراتي شبکي فعاله شي.

د باغران ولسوال وايي، د يو شمير خصوصي شرکتونو مسوولينو له دوی سره ليدلي او هغوی ورسره ژمنه کړې، چې په نږدې راتلونکي کې به په يادې ولسوالۍ کې مخابراتي خدمتونه فعال کړي.

باغران د هلمند يوه له لېرې او وروسته پاتې ولسواليو څخه شميرل کيږي چې له تيرو شلو کلونو راهیسې دغلته د جګړو له امله خلک له هرڅه بې برخې پاتې شوي.

دا په داسې حال کې ده چې په  هلمند ولایت کې  د سلام مخابراتي شبکي د فعالیت ترڅنګ روشن، اتصالات، افغان بیسم، ام ټي ان شبکې فعالیت لري خو په دې وروستیو څو ورځو کې یې په  مرکز لښکرګاه ښارکې هم خدمات په نه شتون حساب دي.

د ورستيو سيلابونو له امله د هېواد په جنوبي ولايتونو کې د مخابراتي شبکو انټرنيټي خدمتونو ته هم زيان اوښتي و، چې په کندهار، هلمند، زابل او ارزګان ولايتونو کې یې انټرنیټ کار نه کوه.