Express Tribune

درې پاکستاني پوځيان «له افغانستان څخه په ډزو کې» ووژل شول

اطلاعات روز: د پاکستان پوځ اعلان کړی چې لږ تر لږه درې پاکستاني پوځیان له افغانستان خاورې څخه د «ترهګرو» له خوا وژل شوي دي.

د پاکستان ایکسپریس ټریبیون ورځپاڼې لیکلي، چې ښايي دا پیښه د اسلام اباد او کابل اړیکې نورې هم پیچلې کړي.

دغې رسنۍ لیکلي چې د طالبانو د موقت حکومت له ژمنو سره سره چې د افغانستان خاوره به د ګاونډي پر ضد نه کاروي، لا هم له هغې غاړې ترهګر د پاکستان لپاره یو امنیتي ګواښ دی.

د پاکستان د پوځ له خوا په خپره شوې بیانیه کې ویل شوي، چې ترهګرو د افغانستان له خاورې څخه د خیبر پښتونخوا د کرم ولسوالۍ په کراچۍ سیمه کې پر پاکستاني ځواکونو ډزې کړې دي. په دې ډزو کې درې پاکستاني پوځیان وژل شوي دي.

په بیانیه کې ویل شوي، چې د پاکستان پوځ په ځوابي برید کې ترهګرو ته درنه مرګ ژوبله اړولې ده.

په دغه بیانیه کې راغلي، چې پاکستان د افغانستان له خاورې د پاکستان پرضد ترهګریز فعالیتونه په کلکو ټکو غندي او تمه لري چې افغان حکومت به په راتلونکي کې د دغه ډول فعالیتونو اجازه ورنکړي.

ایکسپریس ټریبیون لیکي، چې په کابل کې د حکومت له بدلون سره سره له افغانستان څخه د پولې پورې غاړې ترهګریز بریدونه نه دي بند شوي.

د دې رسنۍ په وینا، د اپریل میاشت کې د پولې پورې غاړې د یو لړ تروریستي بریدونو وروسته، پاکستان اړ شو چې د پولې په اوږدو کې یو لړ هوایي بریدونه ترسره کړي.

په دغه بریدونو کې پاکستان خوست ولایت کې ملکي وګړي بمبار کړل چې د طالبانو په وینا لسګونه کسان یې ووژل.