کندهار کې د ماین چاودنې له امله پنځه تنو ته مرګ ژوبله اوښتې

اطلاعات روز: کندهار کې د طالبانو ځايي چارواکي وایي، د دغه ولایت په زیړۍ ولسوالۍ کې د ماین چاودنې پرمهال د یوې کورنۍ درې تنه مړه شوي او دوه ټپیان دي.

د ژیړۍ ولسوالۍ لپاره د طالبانو امنيې قوماندان ملا عطا محمد وایي، چاودنه نن غرمه (دوشنبه، ۲۸ د وږي) شاوخوا ۱۲:۰۰ بجې د یادې ولسوالۍ په «سنځري» کلي کې رامنځته شوې ده.

نموړی زياتوي، چاودنه د پخواني حکومت د ژیړۍ ولسوالۍ د ليواء قومندان محمود په کور کې رامنځته شوې او د‌ هغه د  دوو زامنو په ګډون يې يوه لور هم پکې مړه شوې ده.

د ده په خبره، چې د محمود زامنو غوښتل ترڅو خپل کور له سره ورغوي خو له پخواني وختونو ناچاودو توکو پرې چاودنه کړې او دغه مرګ ژوبله ېې اړولې ده.

د ژیړۍ د امنيه قوماندان په وينا: «مړه شوي کسان د دغه پخواني قومندان بچيان دي او په زخميانو کې د محمود ميرمن او ورور شامل دي.»

هغه زیاته کړه، د دې چاودنې ټول مړي او زخميان يې کندهار کې ميرويس حوزوي روغتون ته انتقال کړي او د ټپيانو درملنه روانه ده.

د يادونې وړ ده چې د سويلي حوزې په ډېری برخو کې لا هم له پخواني وختونو څخه ډېر ناچاوده توکي پاتې دي چې وخت ناوخت د عام وګړو ژوند اخلي.