SM

خوست کې له ۴۴۵ سېلاب ځپلو کورنیو سره نغدي مرسته وشوه

اطلاعات روز: د وروستیو سېلابونو له امله د هیواد د ځینو نورو ولایتونو ترڅنګ په خوست ولایت کې هم خلکو ته ګڼ مالي او ځاني زیانونه واوښتل.

تېره ورځ (سې شنبه،۲۹ د وږي) IRC موسېسې د دغه ولایت د بېلابېلو سیمو له ۴۴۵ هغو کورنیو سره چې د سېلابونو له امله یې مالي او ځاني زیان لیدلی و، نغدي مرسته وکړه.

د خوست ولایت لپاره د طالبانو مرستیال والي محمد انور وویل، چې یاده نغدي مرسته کې د هرې کورنۍ لپاره ۱۴۰۰۰ افغانۍ ځانګړې شوې دي.

هغه همدا راز اوښتو زیانونو په ته په کتو له نړیوالو موسېساتو د لا نورې همکارۍ غوښتنه وکړه او ویې ویل، د سېلابونو له امله په خوست کې د خلکو د استوګنې کورونه نړېدلي او هم یې پراخه کرنیز حاصلات له منځه تللي دي.

د خوست اوسېدونکي په شوې مرسته خوښ دي او غوښتنه کوي، چې دا ډول مرستې باید له توپیري چلند پرته ووېشل، دوی ځکه د دې مرستو په بې طرفه وېش ټینګار کوي، چې اکثره وخت دا ډول مرستې د طالبانو کورنیو او خپلوانو ته ورکول شوې دي.

خوست کې د سېلابونو له امله زرګونه کرنیزه ځمکه، لسګونه د استوګنې کورونه او هم د ولسوالیو ترمنځ وصل شوي پلونو ته زیان رسېدلی چې خلک یې له ګڼو ستونزو سره مخ کړي دي.