SM

هلمند کې د UNHCR موسېسې لخوا نږدې ۷۷۰ کسانو ته د نغدو پیسو ویش پېل شو

اطلاعات روز: هلمند ولايت کې د UNHCR يا د کډوالو په چارو کې د ملګرو ملتونو عالي کميشنرۍ لخوا پر ۷۶۶ کسانو د نغدو پیسو ویش پېل شو.

په دغه ولايت کې د طالبانو د کډوالو چارو رياست ځايي مسوولين وايي، چې د دغه مرستو لړۍ نن (یکشنبه، ۳ د تلې) په سنګین، نوزاد، ګرشک، واشیر، موسی کلا او ګرمسېر ولسوالیو کې هغه کورنیو ته پېل شوه چې د تېرو جګړو له امله یې کورونه ویجاړ شوي.

د کډوالو چارو طالب رییس مولوي الله داد انقیادي وايي، چې هرې کورنۍ ته ۷۰۰ ډالر نغد ورکول کيږي.

نوموړی زیاتوي، دغه کورنۍ يې له وړاندې سروې کړې وې او نن يې ورته د مرستو د ویش لړۍ پېل کړه.

په ورته وخت کې د سيمې خلک د دغو مرستو څخه هرکلۍ کوي او غوښتنه کوي چې په راتلونکي کې دی ورسره نورې مرستې هم وشي.

د سيمې يو اوسيدونکی مولوي حيات الله وايي، چې له دې وړاندې ورسره د خوراکي توکو مرسته شوې خو اوس به یادې پیسې د کور په جوړولو مصرف کړي.

واک ته د طالبانو له رسيدو وروسته په ټول هېواد کې د خلکو اقتصادي وضعیت خراب شوی او دامهال په بد حالت کې ژوند کوي.