اطلاعات روز: هلمند کې د طالبانو سيمه ييز مسوولين وايي، چې د ملګرو ملتونو د ماشومانو د ملاتړ صندوق یا یونیسف غواړي چې د دغه ولایت په سنګین ولسوالۍ کې ۳۶ ویجاړ شوي ښوونځي ورغوي.
د هلمند لپاره د طالبانو د پوهنې ریيس مولوي محمد عوض انصاري وایي، چې د سنګین ولسوالۍ ډیری ښوونځي د جګړو له امله ویجاړ شوي او رغولو ته اړتیا لري.
نموری زیاتوي، پلان لري ترڅو په راتلوونکي کي د يونيسف او ای آر سي موسېسو په مالي مرسته د هلمند په شمالي ولسوالیو کي د ښوونځیو ودانۍ بیا ترمیم ترڅنګ د زده کړو په برخه کې شته ستونزې هم حل کړي.
په ورته وخت کې ددغې ولسوالۍ اوسيدونکي بیا د ښوونځيو د ودانيو د نشت ترڅنګ په ښوونيز بهير کې له زياتو نورو ستونزو څخه شکايت کوي.
د دغې ولسوالۍ يوه اوسيدونکي روزخان اطلاعات روز ته وويل، چې دغلته زرګونه ماشومان له زده کړو بې برخې دي او دوی یې راتلونکي ته انديښمن دي.
نموړی زیاتوي، تېرې ۲۰ کلنې جګړې سنګین ولسوالۍ کې ښوونځیو، کورونو او روغتونونو ته سخت زیان رسولی دی.
دغه راز د هلمند ولايت نور اوسيدونکي هم ورته ادعا لري او د طالبانو له حکومت او نړيوالو موسېساتو غوښتنه کوي چې د دوی په سيمه کې دې له زده کړو بې برخې ماشومانو ته د زده کړو زمينه برابره کړي.
تر ډيره پورې د تړل شویو ښوونځيو پړه پر طالبانو اچول کېږي چې په سيمو کې به يې له ښوونځيو څخه د جګړي د ډګر په توګه کار اخيسته.
په تېره شل کلنه جګړه کې نه یوازې په هلمند ولایت کې ښوونځي ویجاړ شوي او کار ته اړتیا لري بلکې د هیواد په ډیری ولایتونو ښوونځي ویجاړ شوي او یا هم د جوړولو اجازه نه ده ورکړل شوې.