طالبان: د کاج پر ښوونیز مرکز برید کې ۱۹ تنه وژل شوي او ۲۷ نور ټپیان دي

اطلاعات روز:  کابل کې د طالبانو امنیې قومندانۍ وايي، چې د لومړنیو شمیرو له مخې د دغه ښار دیارلسمې حوزې اړوند دشت برچي سیمه کې د کاج پر ښوونیز مرکز برید کې ۱۹ تنه وژل شوي او ۲۷ نور ټپیان دي.

د کابل امنیې قومندانۍ ویاند خالد ځدراڼ اطلاعات روز سره په خبرو کې دغه شمیر تایید کړ.  نموړي د ښوونيزو مرکزونو له مسوولينو وغوښتل، چې د خپل ځانګړي پروګرامونو په اړه له وړاندې له امنيتي حوزو سره همغږي وکړي.

د کاج پر ښوونیز مرکز نن سهار (جمعه، ۸ د تلې) ځانمرګی برید وشو.  سرچینې وایي، ځانمرګي بریدګرو لومړی د دغه ښوونیز مرکز ساتونکي په نښه کړل او بیا ټولګي ته ننوتل.

عيني شاهدان بیا زیاتوي، پېښه هغه مهال رامنځته شوه، چې په دغه تعلیمي مرکز کې د کانکور امادګۍ ازمایښتي ازموینه روانه وه.

د دغه مرکز یو زده کوونکی وايي، چې د چاودنې پر مهال په ټولګي کې شاوخوا ۴۰۰ زده کوونکي موجود وو او چاودنه په لومړي کتار د نجونو په منځ کې شوې.

عامه وګړي وايي، چې د دې برید مرګ ژوبله له هغه شمیر زیاته ده چې طالبانو اعلان کړې ده.  د دغې پېښې د قربانیانو نوملړ چې د کابل په لوېدیځ کې د روغتونونو له خوا شریک شوی، دا هم ثابتوي چې د دغه برید مرګ ژوبله ډېره ده.

لا تر اوسه د دې چاودنې مسوولیت چا په غاړه نه‌دی اخیستی خو له دې وړاندې د کابل په لوېدیځ کې د څو چاودنو مسولیت داعش وسله‌والې ډلې په غاړه اخیستی و.