ترکیه کې د علماوو غونډې ته د طالبانو ویاند: د ټولو نجونو پرمخ د ښوونځیو پرانیستل حتمي دي

اطلاعات روز: په داسې حال کې چې په افغانستان کې له یوه کال څخه زیاته موده نجونې له زده کړو بې برخې دي، د طالبانو ویاند ذبیح الله مجاهد ترکیه کې په یوې غونډه کې یو ځل بیا ژمنه کړې چې د ټولو نجونو پرمخ د ښوونځیو پرانیستل حتمي دي.

نوموړي تېر کال هم ژمنه کړې وه، چې د روان لمریز کال په پیل کې به د نجونو ټول ښوونځي پرانېزي؛ خو دا ژمنه عملي نه شوه او اوس مهال له شپږم ټولګي پورته نجونې له زده کړو بې برخې دي.

داسې ښکاري چې طالب چارواکي د نجونو د تعلیم په اړه د نظر اختلاف لري.

په دې وروستیو کې د طالبانو د بهرنیو چارو وزارت سیاسي مرستیال شېرمحمد عباس ستانکزي کابل کې په یوې غونډه کې د نجونو د ښوونځیو د بیا پرانېستلو غوښتنه کړې وه او ویلي و، چې تعلیم په نر او ښځه مطلق فرض دی او زیاته کړې یې وه د ښوونځیو تړلو لپاره هیڅ شرعي دلیل وجود نه لري.

خو د طالبانو د سرپرست حکومت د امر بالمعروف وزیر خالد حنفي د شېرمحمد عباس ستانکزي د خبرو په غبرګون کې وویل چې دنیاوي تعلیم مباح دی.

له بلې خوا ویل کیږي چې د نجونو پرمخ د ښوونځیو تړلو پریکړه د طالبانو د مشر ملا هبت الله اخوندزاده کړې ده او د دې ډلې ځینې سخت دریځه غړي د دې پریکړې ملاتړ کوي.

خو د طالبانو وياند ذبيح الله مجاهد ترکيه کې د علماوو غونډې ته په خپله وينا کې ویلي، چې د ټولو نجونو پرمخ د ښوونځيو پرانيستل يقيني دي او اوس دغه ډله د نصاب پر ترتیب، ټرانسپورټي سيستم او جلا صنفونو پر جوړولو کار کوي.

طالب چارواکو تېر کال هم ویل، چې د نجونو د ښوونځیو د بیا پرانستلو پر یوې طرحه کار کوي؛ خو څرګنده نه ده چې دا طرحه به کله وروستۍ شي.

د طالبانو ویاند ویلي، په تېر حکومت کې ۷۰ سلنه هېوادوالو زده کړو ته لاسرسی نه درلود؛ خو اوس د هېواد ګوټ، ګوټ کې ټولو وګړو ته د تعلیم زمینه برابره شوې ده.

هغه زياته کړې، چې د هېواد په ١٤٠ پوهنتونونو کې لسګونه زره نجونې په زده کړو بوختې دي. دا په داسې حال کې ده چې طالبانو د نجونو پر زده کړو سخت بندیز لګولي دي. دغې ډلې د کانکور په سږنۍ ازموینه کې د نجونو د انتخاب پاڼې څخه د انجينري او ژورناليزم په ګډون ځينې څانګې لېرې کړې وې.

د یادونې وړ ده چې طالبانو په خپل تېر حکومت کې هم نجونو ته د زده کړو اجازه نه ورکوله. دې ډلې اوس مهال په زیاتره دولتي ادارو کې ښځې له کار کولو منع کړې دي.