ګردېز ښاروالۍ په تېرو شپږو میاشتو کې ۴۱ میلیونه عواید راټول کړي

اطلاعات روز: د پکتیا مرکز ګردېز ښاروالۍ مسوولین وايي، په تېر شپږو میاشتو کې یې ۴۱ میلیونه افغانۍ عواید راټول کړي، خو هټۍ وال شکایت کوي چې په یوه او بله بهانه ترې پیسې اخیستل کېږي.

په پکتیا ولایت کې د طالبانو د ګردېز ښاروالۍ ریاست مسوولینو د حساب ورکولو په موخه په جوړه شوې غونډه کې ښاریانو ته د تېرو شپږو میاشتو حساب ورکړ او ویې ویل، چې دوی په دغه موده کې له بېلابېلو برخو ۴۱ میلیونه افغانۍ عواید لاسته راوړي دي.

دوی همدا راز زیاته کړه، چې په تېرو شپږو میاشتو کې یې د ۵۰ میلیونه افغانیو په ارزښت ځینې رغنیزې پروژې بشپړې کړي او ځینې نورې یې هم تر کار لاندې دي.

د ګردېز ښاروالۍ له ولس سره په داسې مهال د خپلو لاسته راوړنو حساب شریکوي، چې ښاریان د ښاروالۍ له لوړې ماليې شکايت کوي او وايي په یوه او بله بهانه ورڅخه پيسې اخيستل کيږي.

دوی وايي، د ښاروالۍ له لوري ورباندې څو برابره زیاته ماليه ټاکل شوې چې دوی یې د ورکړې توان نه لري.

په دې اړه د ښار یو تن هټۍ وال اطلاعات روز ته وویل، چې د ښاروالۍ ریاست کارمندانو یې څو ورځې وړاندې په دې موخه د دوکان دروازه پرې وتړله چې د یوې کوچنۍ لوحې یا اعلان پیسې یې پر وخت نه وې تحویل کړې.

هغه زیاته کړه چې اقتصادي ستونزو ته په کتو دې ښاروالۍ او د مستوفیت ریاستونه دې په خپلو وضع شویو مالیاتو کې کموالی راولي.

هټې وال وویل: «زه دا منم چې دوی په دومره کچه عواید راټول کړي، دا یې له دې مظلومو دوکاندارانو په یو او بل نوم په زور اخیستې دي، کله د کثافاتو بهانه وي او کله هم د لوحو په بهانه. زما په دوکان یوه وړه لوحه نصب شوې وه دوکان یې درې ورځې راباندې تړلی و، چې تا ولې د دې مالیه نه ده ورکړې.»

که څه هم ځینې هټۍ وال او د مارکېټونو خاوندان د ښاروالۍ له اخیستونکې مالیې خوښ نه دي، خو بلخوا بیا ښاریان د دغه ریاست له ترسره کړیو رغنیزو چارو هرکلی کوي او د دوام غوښتونکي یې دي.