اطلاعات روز: د پکتيا ولايت ډيورنډ فرضي کرښې ته څېرمه په ډنډپټان ولسوالۍ کې له پاکستاني پوځيانو سره د طالبانو له نښتې وروسته د څو ورځو په تېرېدو نه يوازې له ياد هيواد سره د خرلڅي دروازه تړل شوې بلکې په دغه ولسوالۍ کې ټول ښوونځي هم د جګړو د وېرې له وجې د زده کوونکو په مخ بند پاتې دي.
يوه اونۍ وړاندې پاکستاني ځواکونه هغه مهال له طالبانو سره په نښته واوښتل، چې ډيورنډ فرضي کرښې ته څېرمه د طالبانو له خوا يوې امنيتي پوستې ته د لارې جوړېدو کارونه پيل کړل.
په کرښه د دواړو غاړو ترمنځ جګړې درې ورځې دوام وکړ، د ځاني او مالي تلفاتو سربېره له پټان سلګونه کورونه هم د خپلو مېنو پرېښودو ته اړ او د سر خونديتوب لپاره د څمکنيو ولسوالۍ ته بېځايه شوي.
د دغې ستونزې ور هاخوا چې ځايي خلک ورسره مخ دي، تر څنګ يې په تېره يوه اونۍ کې د ډنډپټان-پړاچينا ترمنځ لاره هم تړل شوې او په پټان کې ټول دولتي ښوونځي هم د جګړې بيا پيل له امله تړل شوي دي.
په ډنډپټان ولسوالۍ کې د پټان دولتي لېسې يو ښوونکي چې د نوم له ښودلو يې ډډه کوله اطلاعات روز سره په خبرو کې وويل، چې اوس مهال په نورو سيمو کې کلنۍ ازموينې پيل شوې خو دوی د جګړې له ويرې لاهم خپل زده کوونکي نه دي راغوښتي.
نوموړی وايي: «يوه اونۍ وشوه چې دلته پټان کې زمونږ ښوونځي تړلي دي او پرمهال يې بيا په نورو سيمو کې کلنۍ ازموينې پيل شوې دي، لامل خو يې له پاکستان سره چې دغه نښته وشوه نو خلک کډه شول او ماشومان هم له خطر سره مخ شول.»
د پټان ولسوالۍ يو اتلس کلن زده کوونکي نورالله اندېښمن دی او وايي، لاهم د ښوونځيو بيا خلاصون په اړه دوی ته ډاډ نه دی ورکړل شوی او په خبره يې چې له همدې وجې يې په زده کړو خورا منفي اثر غورځېدلی دی.
هغه د طالبانو له ولايتي مسوولين غوښتنه وکړه، تر څو له پاکستان سره راپورته شوې ستونزه ژر حل او په سيمه کې له اوسني ترينګلي حالت څخه ځان وباسي.
له پاکستان سره پر پوله د طالبانو له خوا د تاوتريخوالی زيات شوی او د تېرې جګړې له امله دواړو غاړو ته درنه مرګ، ژوبله هم واوښتله.
ويل کيږي چې طالبان غواړي د ډنډپټان ولسوالۍ لار د ځاځي اريوب له سرحدي ولسوالۍ سره ونښلوي؛ خو پاکستان د دې کار مخالفت کوي.
د دغې ستونزې د هواري په موخه ځايي مشرانو او پکتيا کې د طالبانو ولايتي مسوولينو هڅې چټکې کړې دي.
د دغه ولايت لپاره د طالبانو والي ډنډپټان ولسوالۍ ته په سفر کې له کرښې د ليدنې ترڅنګ په سيمه کې له طالب پوله ساتو سره هم خبرې کړې دي، خو رسنيو ته تر اوسه د شخړې هواري او لارې خلاصون په اړه معلومات نه دي ورکړل شوي.