اطلاعات روز: د افغانستان لپاره د بريتانيا سفارت شارژدافېر هوګو شورټر ويلي، چې په غير دولتي سازمانونو کې د ښځو د کار په بندولو طالبان د افغانستان د خلکو له ژوند سره لوبې کوي.
نموړي په یو لړ ټويټونو کې لیکلي، چې د طالبانو دا پرېکړه ښکاره تبعيض، د نړيوالو قوانينو او د بشري مرستو د اصولو نقض دی.
هوګو شورټر زیاته کړې، چې بريتانيا، د ملګرو ملتونو امنيت شورا، د اسلامي همکاريو سازمان، جي اووه، غير دولتي سازمانونه او ډېر نور له طالبانو غواړي چې دا نه توجيه کېدونکی بنديز دې لېرې کړي.
ده ويلي، چې په افغانستان کې د بشردوستانه مرستو لپاره افغانې ښځې ډېري مهمې دي.
د ده په وينا، يو شمېر سازمانونو په يوه شپه تر ۴۰ سلنې زياتې کارمندانې له لاسه ورکړي دي.
د بريتانيا د سفارت شارژدافېر په خبره، چې د دغو ښځو ډېری يې داسې شرايطو کې ښځو او ماشومانو ته مرستې رسوي چې سړي يې تشه نه شي ډکولای.
ده ټينګار کړی، چې د ښځو پر کار بنديز د غير دولتي سازمانونو د فعاليت وړتيا په جدي توګه محدودوي.
د بريتانيا د سفارت شارژدافېر په دوام سره وایي، چې د يو لړ بشري مرستو درېدل د طالبانو د پرېکړي پايله ده.
ده زياته کړې، چې بريتانيا له ټولو مرسته کوونکو، غير دولتي سازمانونو او ملګرو ملتونو سره همکاري کوي چې د طالبانو له تحميل شويو بنديزونو سره سره دا ډاډ تر لاسه کړي چې اړمنو ته د ژغورنې مرستې رسېږي.
د ده په وينا، تر څو چې طالبان له خپلې دې پرېکړي پر شا نشي ډېرو اړمنو افرادو ته به مرسته رسول ناشوني وي.
طالبانو په دې وروستيو کې د ښځو پر تحصيل له بنديز سره – سره، په غير دولتي بنسټونو کې د ښځو پر کار هم بنديز لګولی دی.
د طالبانو دې وروستيو دوو پرېکړو نړيوال غبرګونونه را پارولي دي.
څو مرستندويو بنسټونو هم خپل فعاليتونه ځنډولي.