هلمند کې د پنبې د تولید یوې کارخونې فعالیت پېل کړ

اطلاعات روز: د هلمند په مرکز لښکرګاه کې د ۶۵ میلیونه افغانیو په پانګونه د پنبې د تولید یوه کارخونه پرانیستل شوه چې په ساعت کې د درې ټنه پنبې د تولید وړتیا لري.

د دې فابریکې مسوول رحمت الله نظري وايي، چې د پنبې د تولید دغه فابریکه یې د ۶۵ میلیونه افغانیو په پانګونه د اتوو میاشتو په موده کې جوړه او شاوخوا ۲۰۰  کسانو ته پکې په مستقیم او غیر مستقیم  ډول د کار زمینه برابره شوې ده.

هغه زیاته کړه، دغه فابریکه په ساعت کې د درې ټنه دانه‌دارې پنبې د تولید وړتیا لري چې ترڅنګ یې غوړي، کنجاړه او صابون هم تولیدوي.

د هلمند د صنعت او سوداګرۍ د ټولنې مشر غلام یحیی پښتون وايي، چې په دغه ولایت کې صنعت د ودې په حال کې دی او ډېرو سوداګرو د صنعت په برخه کې پانګونې ته مخه کړې ده.

دی زیاتوي، اوس مهال په دغه ولایت کې شاوخوا ۴۱ فابریکې فعاله شوي چې ۳۵۰۰ کسانو ته پکې د کار زمینه هم برابره شوې ده.

همدې حال کې د هلمند ولایت لپاره د طالبانو  مرستیال والي عبدالرحمن کندوزي د یادې فابریکې جوړیدل ګټور وبلل او زیاته یې کړه چې دوی هڅه کوي چې سوداګرو ته د صنعت په برخه کې د امنیت ترڅنګ نورې اسانتیاوې هم برابرې کړي.

دغه راز د دې کارخوني کارګر هم خوښ دي  او وایي، چې مخکې بې کاره وو، خو اوس دلته په کار شوي او خپله ورځنۍ مزدوري کوي.

یاده دې وي چې دا په هلمند کې د پنبې د پروسېس ۴۱مه فابریکه ده چې په فعالیت پېل کوي.