اطلاعات روز: د ملګرو ملتونو کارپوهانو د يوې ګډې اعلاميې له لارې په افغانستان کې د ښځو او نجونو د وضعيت ډاګيز کړی او غوښتنه يې کړې چې جنسيتي اپارتايډ دې د بشريت پر خلاف د جنايت په توګه په رسمیت وپېژندل شي.
دا اعلاميه د ښځو او نجونو د تبعيض پر خلاف د کاري ډلې د رييس دوروتي استرادا تانک، کلوديا فلورس، ايوانا کرستیچ، هاینا لو و لورا نيرينکیندی له لوري خپره شوې.
دې کارپوهانو ويلي، چې جنسيتي اپارتايډ يو واقعي ګواښ او په ټوله نړۍ کې د ميليونونو ښځو او نجونو لپاره ژوندی واقعيت دی چې تر اوسه لاهم په نړيوالو حقوقو کې په صراحت نه دی تدوين شوی.
دوی ويلي، وخت را رسېدلی چې جنسيتي اپارتايډ د نړيوالې ټولنې له لوري د بشريت پر خلاف د جنايت په توګه وپېژندل شي.
د ملګرو ملتونو د کارپوهانو په اعلاميه کې راغلي چې کوم دولتي قوانين، سياستونه او اقدامات د ښځو د انساني حقونو د له منځه وړلو په موخه پر هغوی سخت ظلم کوي او نابرابرو شرایطو ته يې برابروي، د اپارتايډ د سيسټمونو د اصلي هستې منعکسوونکي دي.
دوی خبرداری ورکړی چې په افغانستان کې د طالبانو فرمانونه، سياستونه او تګلارې د ښځو او نجونو پر وړاندې د تبعيض، ستم او سلطې يو داسې بنسټيز شوی سيسټم رامنځته کوي چې د جنسيتي اپارتايډ معادل دی.
د ملګرو ملتونو کارپوهانو ټينګار کړی چې د طالبانو حکومت په نړيوالو حقوقو کې د جنسيتي اپارتايډ تدوينول ضروري کړي، ځکه دا کار نړيوالې ټولنې ته اجازه ورکوي تر څو د افغانستان د ښځو او نجونو پر حقونو د طالبانو بريدونه په ښه ډول وپېژني او رسيدګي ورته وکړي.
دوی د بشريت پر خلاف د جناياتو د مخنيوي او مجازات په تړاو د مسودې چې اوس مهال د ملګرو ملتونو د عمومي غونډې په شپږمه کمېټه کې ارزول کېږي، د دويمې مادې پر اساس غوښتنه کړې چې جنسيتي اپارتايډ دې د بشريت پر خلاف د جنايت په توګه وپېژندل شي.
طالبانو تر واکمنېدو وروسته د ښځو او نجونو پر حقونو سخت محدوديتونه لګولي دي.
د بشري حقونو د فعالانو په اند، د طالبانو دا کار جنسيتي اپارتايډ دی چې بايد په رسميت وپېژندل شي.
