اطلاعات روز: د کرکټ د نړیوال شل اوریز جام د ګروپي لوبو په لړ کې افغانستان وکولای شول چې د پاپوا نيو ګيني (پي اين جي) له لوري د ۹۶ منډو هدف په اوو ويکټو پوره کړي.
افغانستان د نننۍ (جمعه، ۲۵ د غبرګولي) لوبې د ټاس په ګټلو سره لومړی د توپ اچونې پرېکړه وکړه او په ۱۹ اورونو کې يې د مقابلې لوبډلې ټول لوبغاړي پر ۹۵ منډو وسوځول.
د افغانستان له لوري فضل الحق فاروقي درې، نوين الحق دوه او نور احمد د مقابلې لوبډلې يو لوبغاړی وسوځاوه. د يادونې وړ ده چې د پي اين جي نور لوبغاړي رن اوټ شول.
افغان توپ وهونکو وکولای شول چې د پاپوا نيو ګيني له لوري ټاکل شوی هدف د لوبې په ۱۶ اور کې د درو لوبغاړو په سوځېدو سره پوره کړي. د افغانستان له لوري ګلبدين نايب تر ټولو ډېري ۴۹ ناسوځيدلې منډې وکړې.
افغانستان په دې بريا سره د شپږو نومرو په لرلو د خپل سي ګروپ په سر کې دی. افغانستان به د روانې جون مياشتې پر ۱۷ خپله وروستۍ ګروپي له ويسټ انډيز سره کوي. افغانستان تر دې وړاندې په خپل ګروپ کې نيوزيلينډ او يوګانډا مات کړي.
د يادونې وړ ده چې افغانستان په دې بريا سره د نړيوال جام د اتو غوره لوبډلو پړاو ته لار ومونده او هلته به له هند، اسټراليا او بنګلديش سره په يوه ګروپ کې لوبېږي.