اطلاعات روز: د کرکټ د نړیوال شل اوریز جام په وروستۍ ګروپي لوبه کې ويسټ انډيز افغان لوبډلې ته د ۲۱۹ منډو هدف وټاکه او له افغانستان څخه يې په ۱۰۴ منډو لوبه وګټله.
د ويسټ انډيز او افغانستان د کرکټ د ملي لوبډلو تر منځ لوبه نن (سېشنبه، ۲۹ د غبرګولي) ترسره شوه چې ويسټ انډيز پکې لومړی د توپ وهنې په کولو سره افغانستان ته په ټاکلو شلو اورونو کې د ۲۱۹ منډو هدف وټاکه.
د ويسټ انډيز له لوري نيکولاس پوران تر ټولو ډېري ۹۸ منډې وکړې او رن اوټ شو.
د افغانستان له لوري په توپ اچونه کې ګلبدين نايب دوه او عظمت الله عمرزي او نوين الحق يو-یو ويسټ انډيزي لوبغاړي وسوځول.
د افغانستان له لوري د توپ وهنې پيل ښه نه و او خپل بريدګر او په دې نړیوال جام کې ټولو ډېري منډې کوونکی لوبغاړی رحمان الله ګربز پر صفر وسوځېد. د افغانستان له لوري ابراهيم ځدراڼ تر ټولو ډېري ۳۸ منډې وکړې.
دا په سي ګروپ کې د افغانستان وروستۍ لوبه وه او تر دې وروسته به د روان جون مياشتې پر ۲۰ له هند سره د اتو غوره لوبډلو په پړاو کې مخ کېږي.
د يادونې وړ ده چې افغانستان په خپل ګروپ کې تر دې لوبې وړاندې خپلې لومړنۍ درې لوبې له يوګانډا، پاپوا نيوګيني او نيوزيلينډ څخه ګټلې دي.
