اطلاعات روز: د افغانستان د حقوق پوهانو اتحاديې د دوحې له درېيمې غونډې د ښځو، مدني ټولنې او نورو فعالانو حذف خواشينوونکی او د اندیښنې وړ بللی دی.
دې اتحاديې د يوې اعلاميې په خپرولو سره ويلي، دا چې طالبان په منظمه توګه د بشريت پر خلاف جنايتونه کوي او ملګري ملتونه په غونډه کې د ګډون لپاره د طالبانو شرطونه مني او د دوحې له غونډې ښځې حذفوي، دا د افغانستان د ښځو او نارينهوو له غوښتنو او د بشري حقونو له ټولو نړیوالو کنوانسيونو سره په ټکر کې دي.
د حقوق پوهانو د اتحاديې په اعلاميه کې راغلي چې د طالبانو نامشروع غوښتنې منل په دې معنا دي چې د افغانستان د وګړو په ځانګړې توګه د ښځو او مدني ټولنو پر وړاندې د دوی له جناياتو انکار کېږي.
دې اتحاديې ويلي، چې که ملګري ملتونه او غړي هيوادونه نړيوالو اصولو ته پام ونه کړي، نو دا چاره کولای شي چې د تاوتريخوالي له پياوړتيا سره مرسته وکړي.
حقوق پوهانو ټينګار کړی چې د دوحې په کانفرانس کې د افغانستان د ښځو فعال ګډون نه يوازې په اخلاقي توګه لازمي چاره ده، بلکې په قانوني توګه هم لازمي دي.
د دې اتحاديې په اعلاميه کې ويل شوي چې په دا ډول غونډو کې د ښځو ګډون نه يوازې په افغانستان کې د اوسنيو شخړو لپاره بشپړې او پايدارې حللارې شونې کوي بلکې د سيمې او نړۍ امنيت او ټيکاو هم پياوړی کوي.
ټاکل شوې چې د افغانستان په چارو کې د هيوادونو د ځانګړو استازو درېيمه غونډه نن او سبا په دوحه کې جوړه شي.
له راپورونو سره سم، په اصلي غونډه کې له افغانستانه يوازې د طالبانو پلاوی ګډون کوي او د ښځو او مدني فعالانو استازي نه دې ور بلل شوي.
د ملګرو ملتونو پر دې تصميم پراخې نيوکې شوې دي. د بشري حقونو فعالانو او ښځينه معترضينو له دې غونډې سره د پرېکون غوښتنه کړې ده.
راپورونه وايي، چې د دوحې په غونډه کې پر مالي مسايلو او له نشه يي توکو سره پر مبارزې خبرې کېږي؛ په داسې حال کې چې د بشري حقونو فعالان ټينګار کوي چې د بشري حقونو او د ښځو د حقونو کړکېچ بايد لومړيتوب ولري.
