اطلاعات روز: په فراه کې د طالبانو سیمهییز چارواکي خبر ورکوي چې د دغه ولایت د فراه ښار اړوند د «شیخ ابونصر فراهی» بندر ته نږدې سیمه کې د یوې ترافیکي پېښې له امله دوه تنه مړه او شپږ نور ټپیان شوي دي.
فراه کې ځایي سرچینې هم وایي چې پېښه تیره ورځ (شنبه، ۲۰ د سلواغې) ماښام ۶ بجې د دوو «فیلډر» موټرونو د ټکر له امله رامنځته شوې.
د عیني شاهدانو په وینا، ټپیان د درملنې لپاره نږدې روغتون ته انتقال شوي او د ځینو روغتیایي وضعیت نازک ښودل شوی دی.
د ترافیکي پېښو د زیاتوالي په اړه د سیمې اوسېدونکي اندېښمن دي او وایي، که موټرچلوونکي ترافیکي قوانین رعایت نه کړي، دا ډول پېښې به نورې هم زیاتې شي.
د یادونې وړ ده چې په افغانستان کې د ترافیکي پېښو یو مهم لامل د سړکونو خرابوالی، د چلوونکو بې احتیاطي او چټک سرعت ګڼل کېږي، چې هر کال لسګونو کسانو ته مرګژوبله اړوي.
