اطلاعات روز: د بلخ-سمنګان پر لویه لار د یو ۵۸۰ ډوله مسافر وړونکي بس د چپه کېدو له کبله درې تنه مړه شوي او ۳۳ نور ټپیان دي.
په سمنګان کې د طالبانو د امنیې قومندانۍ ویاند حشمت الله رحماني وویل، چې دا پېښه نن سهار (سې شنبه، ۱۶ د غویي) د خلم ولسوالۍ اړوند «کفترخانو» سیمه کې رامنځته شوې ده.
د عیني شاهدانو په وینا، یو ۵۸۰ ډوله مسافر وړونکی بس چې له کابل څخه جوزجان ولایت ته روان و، په دې سیمه کې له سړک څخه وتلی او چپه شوی دی.
رحماني زیاتوي، چې په دې پېښه کې درې کسان مړه شوي او ۳۳ نور ټپيان دي.
د هغه په وينا، ټپيان د سمنګان ولايتي روغتون ته لېږدول شوي، چې په کې ښځې او ماشومان هم شامل دي.
د پېښې د لامل په اړه څه نه دي ویل شوي.
هېواد کې د ترافیکي پېښو لوی لاملونه چټک سرعت، خراب سړکونه او د موټر چلوونکو بې احتیاطي ګڼل کېږي.
که څه هم د تېز رفتاره کوچنیو موټرو د ټکر یا چپه کېدو له امله ګڼې پېښې رامنځته کېږي او تلفات هم لري، خو کله ناکله د لویو لارو په اوږدو کې د بسونو ټکر یا چپه کېدل درنې مرګژوبلې اړوي.