خلق ارا یېتکرمهلرنینگ خبر بېریشیچه، نیپال و چیندهگی سوو تاشقینلری عاقبتیده جان بېرگنلر سانی۷۶۸ نفرگه یېتگن، ینه۳ مینگ ۴۸ کیشی بېدرَک یۉقالگن.
فرانسه خبرگزارلیگی خبریگه کۉره، نیپال فوق العاده وضعیتلر وزیرلیگی بوگون (یکشنبه، ۸-سنبله) مملکتدهگی سوو تاشقینلری عاقبتیده هلاک بۉلگنلر سانی۷۵۲ نفرگه یېتگنینی معلوم قیلگن. ینه۲ مینگ۵۰۲ کیشی، جملهدن،۵۸۵ کیشی چېت اېللیک بېدرَک یۉقالگن.
عینِ پیتده چین دولت یېتکرمهلری چهارشنبه کونی تبتده یوز بېرگن سوو تاشقینلری عاقبتیده۱۶ کیشی هلاک بۉلگنی، ینه۵۴۶ کیشی بېدرَک یۉقالگنینی خبر قیلگن.
فرانسه خبرگزارلیگی خبریگه کۉره، نیپال حکومتی بوگون جسدلرنی دفن اېتیش جریانینی اولرنینگ عایلهلریگه کېینچهلیک انیقلش امکانینی بېریش اوچون «دیانای» نمونهلرینی آلیش و بېلگیلر قۉییشدن سۉنگ باشلهگنینی معلوم قیلگن.
اهالیسی نینگ اکثریتی هندو دینیگه اعتقاد قیلهدیگن نیپالده جسدلرنی عنعنوي طرزده مخصوص اۉتینلر اوستیگه قۉییب کویدیریشهدی. شو سببلی جسدلرنی دفن اېتیش اوزاق دوام اېتهدیگن جریان حسابلنهدی.
نیپال تشقی ایشلر وزیری آمریت بهادر رای، ژورنالیستلرگه دفن اېتیلگن برچه جسدلر دقّت بیلن رۉیخطگه آلینگنینی ایتگن. شو بیلن بیرگه، او خلق ارا همجعیتدن یاردم سۉرب، نېپالگه جسدلرنی سقلش اوچون «مینگدن آرتیق» موزلتکیچ قوریلمهلری کېرهکلیگینی بیلدیرگن.
اونینگ قۉشیمچه قیلیشیچه: «خلقارا قیزیل خاچ کمیتهسی کبی تشکیلاتلرنینگ ستندرد و قبول قیلینگن پروتکوللریگه رعایه قیلگن حالده، جسد قالدیقلری، اینیقسه انیقلش نینگ امکانی بۉلمهگنلری، وقتینچه دفن اېتیلدی.»
نیپال تشقی ایشلر وزیری، شونینگدېک، «طبي گروهلر دفن اېتیشدن آلدین هر بیر قربان نینگ دیانان نمونهسینی آلدی. بو عایلهلرگه کېینچهلیک نمونهلرنی سالیشتیریش و ضرور مراسملرنی اۉتکزیش اوچون جسدلرنی قَیته قبردن چیقریشگه امکان بېرهدی»، دېدی.
آمریت بهادر رای،: «کۉپلب جسدلر ییغیب آلیندی و چیري باشلهدی. جماعت سلامتلیگینی محافظه قیلیش اوچون چیرياتگن جسدلرنی دفن اېتیشگه مجبور بۉلدیک»، دېدی .
نیپال و تبت چهارشنبه کونی اېرتهلب ویرانکار سوو تاشقینلریگه دوچ کېلدی. تبتده موزلیک نینگ قولهشی عاقبتیده هیمالیا تاغلریدهگی دریا اۉزنیدن اولکن مقداردهگی لای، تاش و موز آقیمی کېلیب توشگن.
سوو تاشقینی قیشلاقلر و واديلرنی باسیب، کاتماندو شهریدن تبت نینگ لهاسا شهریگه آلیب بارووچی یۉلدهگی الکتر ستشنلری، یۉللر و کۉپریکلرنی ویران قیلگن. مذکور یۉلدن سیاحلر و زیارتچیلر تبتگه باریشده فایدهلنهدی.
سوو تاشقینی صادر بۉلگنیدن بویان قربانلر سانی آرتیب بارماقده. بېدرَک یۉقالگنلرنی تاپیش بۉییچه قیدیروو-قوتقروو ایشلری همان دوام اېتماقده.
