اروپا اتفاقیگه اعضا بېش دولت باشپناه سۉراوی رد اېتیلگن مهاجرلر اوچون اروپا اتفاقیگه اعضا بۉلمهگن بیر مملکتده «قَیتریش مرکزی» تشکیل اېتیش بۉییچه کېلیشووگه اېریشیشگه اورینماقده.
فرانسه اخبارات آژانسی خبریگه کۉره، دانمارک، یونان، اتریش، آلمان و هالند رسميلری اوشبو تشبث یوزهسیدن کپنهاگده مذاکره آلیب بارماقده.
دنمارک تشقی ایشلر وزیری مورتن بودسکوف: «ینگی ییل عرفهسیده اروپا اتفاقیدن تشقریدهگی همکار دولت بیلن عمومي کېلیشووگه اېریشهمیز، دېب کوتماقدهمیز»، دېگن.
مذاکره آلیب باریلهیاتگن دولت یاکه دولتلر نامی آشکار اېتیلمهگن. بیراق اوگاندا و رواندا احتمالي وریانتلر صفتیده علیحده تیلگه آلینماقده.
یوناننینگ مهاجرلر و باشپناه مسألهلری وزیری تانوس پلویرس اوچرهشووگه کیریش چاغیده مقصد ۲۰۲۷-ییلگچه اروپا اتفاقیگه اعضا بۉلمهگن بیر مملکتده «قَیتریش مرکزی»نی ایشگه توشیریش اېکنینی ایتگن.
دنمارک اوّلراق رد اېتیلگن باشپناه ایزلاوچیلرنی ۲۰۲۷-ییل باشیدن اېمس، بلکه شو ییل آخریگچه بوندهی مرکزلرگه یوباریشگه تیارلیگینی بیلدیرگن اېدی.
بودسکوف اوّلگی بیاناتیده: «دنمارکده ناقانوني یشهیاتگن خارجلیکلر اولرنی قَیتریشدهگی قیینچیلیکلریمیز سبب مکافات آلیشینی قبول قیلمهیمیز»، دېگن اېدی.
اروپا پارلمانی جون آییده مهاجرلر ساحهسیده قطعيراق قاعدهلرنی معقولهگن. اوشبو قاعدهلر رسميلرنینگ مهاجرلرنی حبسگه آلیش وکالتلرینی سېزیلرلی درجهده کېنگهیتیرهدی همده «قَیتریش مرکزلری» تشکیل اېتیش امکانینی بېرهدی.
مذکور رېجه انسان حقوقلری تشکیلاتلری نینگ کېسکین تنقیدیگه اوچرهگن.
بویوک بریتانیا حجتسیز مهاجرلرنی روانداگه چیقریب یوباریش رېجهسیدن واز کېچگن. ایتاليا تامانیدن البانيهده مهاجرلر ایشلرینی کۉریب چیقیش اوچون تشکیل اېتیلگن مرکزلر اېسه حقوقي معمالر و مهاجرلر نینگ اولرگه کم مراجعت قیلیشی بیلن باغلیق قیینچیلیکلرگه دوچ کېلگن.
