طالبلر عدلیه وزیرلیگی مزار شریف شهری، بلخ ولایتی مرکزیدهگی «دیپلوماتیک شهرچهسی» نینگ برچه یېرلرینی مخصوص محکمه «دولت ملکی» دېب بېلگیلهگنینی معلوم قیلدی.
خوشبو وزیرلیک بوگون (چهارشنبه، ۱-مېزان) نشر قیلگن بیاناتیده ایتیشیچه، اوشبو شهرچه یېرلری مزار شریف شهری نینگ دشتی شاديان حدودیده جایلشگن بۉلیب، میدانی ۲ مینگ ۶۵۷ جریبدن آرتیقنی تشکیل اېتهدی.
بیاناتده ایتیلیشیچه، «شمالي زوندهگی دولت تصرفیدهگی تارتیب آلینگن یېرلر بۉییچه ایشلرنی کۉریب چیقیش مخصوص محکمه» بلخ ولایتیدهگی «دیپلوماتیک شهرچهسی» دېب اتهلووچی ۲ مینگ ۶۵۷ جریبدن آرتیق یېرگه عاید حجتلرنی اۉرگنیب، اوشبو یېرلر نینگ برچهسی «دولت ملکی» اېکنینی بېلگیلهگن.
طالبانلر عدلیه وزیرلیگی اۉتگن هفته سۉنگگی تۉرت ییل دوامیده ۱۴ ولایتدهگی ۴۹ ته شهرچه یېرلری تۉلیق یاکه قسماً «دولت ملکی» صفتیده بېلگیلنگنینی معلوم قیلگن اېدی. طالبانلر اوشبو شهرچهلردهگی یېرلر، تورر جایلر و سودا مرکزلری نینگ برچهسینی مصادره قیلیشنی رېجهلشتیرماقده.
ایریم شهرچهلرنی، جملهدن، کابلدهگی «امید سبز» و غزنیدهگی «نواباد» شهرچهلرینی مصادره قیلیش حقیده قرار چیقریلگن.
وزیرلیک مملکت بۉیلب ینه اۉنلب شهرچهلرگه عاید ایشلر و حجتلرنی کۉریب چیقهیاتگنینی، اولر بۉییچه هم تېز آرهده قرار قبول قیلینیشینی بیلدیرگن.
طالبلر عدلیه وزیری عبدالحکیم شرعی نظارتی آستیده فعالیت یوریتووچی «یېرلرنی تارتیب آلیش نینگ آلدینی آلیش و تارتیب آلینگن یېرلرنی قَیتریش کمیسیونسی» نینگ حرکتلری کۉپلب تنقیدلرگه اوچرهماقده. تنقیدچیلر اوشبو کمیسیون نینگ قرارلرینی عدالتلی دېب حسابلهمهیدی
