طالبلر ینگی پاکستان اوردوسی هجوملریده هېچ قندهی تلفات و ضرر یېتمهگنینی ایتهیاتگن بۉلسه-ده، محلي منبعلر «اطلاعات روز» گزیتهسیگه بېرگن معلوماتگه کۉره، بو هجوملرده قندهار، خوست و پکتیا ولایتلریدهگی طالبلرنینگ مهم حربي بازهلری و قورال-یراغ انبارلری نشانگه آلینگن.
قندهاردن آلینگن محلي منبع نینگ ایتیشیچه، بوگون (پنجشنبه، ۲ میزان) تانگگی ساعت ۳:۳۰لر اطرافیده عملگه آشیریلگن هوا هجومیده قندهار شهری ۹-ناحیهسی نینگ «سرای ملا صاحب» حدودیدهگی قورال-یراغ انباری ویران قیلینگن.
منبع نینگ ایتیشیچه، پاکستان هجومی طالبلرنینگ قورال-یراغ ذخیرهسیگه قرهتیلگن و هجوم نتیجهسیده یوزهگه کېلگن پارتلش جوده کوچلی بۉلگن.
منبعگه کۉره، اوشبو جای بیر نېچه اۉن ییللر دوامیده قورال-یراغ و حربي اۉق-داریلر انباری صفتیده فایدهلنیب کېلینگن. پارتلش کوچی قندهار شهرینینگ برچه حدودلریده سېزیلگن بۉلیب، بو کوچلی پارتلش انباردهگی اۉق-داریلرنینگ بیر وقتده پارتلشی نتیجهسیده یوزهگه کېلگن بۉلیشی ممکن.
عینِ وقتده پکتیا ولایتیده هم کوچلی پارتلشلر آوازی اېشیتیلگن.
پکتيادهگی محلي منبع «اطلاعات روز» گزېتهسیگه بېرگن معلوماتیده پاکستان قیرووچی اوچاقلری ولایت مرکزی گردېز شهریدهگی طالبان نینگ «۲۰۳ منصوري» کارپوس مرکزینی بامباردمان قیلگنینی ایتدی.
اسمینی آشکار قیلیشنی ایستهمهگن منبعنینگ ایتیشیچه، پارتلشلر آوازی جوده کوچلی بۉلیب، اوزاق مصافهدن هم اېشیتیلگن.
منبعگه کۉره، پاکستاننینگ اوشبو هوا هجومیدن سۉنگ طالبان کارپوسی مرکزی ایچیدن النگهلر کۉککه کۉتریلگن و بو حالت یقّال کۉرینگن.
منبعنینگ ایتیشیچه، پاکستان درونلری اېرتهلب ساعت ۸:۰گچه گردیز شهری اوزره پرواز قیلگن، طالبلر اېسه یېردن اولرگه قرهته اۉق اوزگن.
خوست طالبلر بیر نېچته حدودیده هجوملر عملگه آشیریلگنینی بیلدیرگن ینه بیر ولایتدیر.
طالبلرنینگ خوست ولایتی والیسی مطبوعات سوزلاوچیسی مستغفر گربز بیاناتیده پاکستان گربز اولسواللیگیده «گُلها» لاگېری، شونینگدېک، مرکز و اسماعبلخیل همده مندوزی تومنلریگه هجوملر اویوشتیرگنینی، بو هجوملرده هېچ قندهی تلفات بۉلمهگنینی ایتدی.
اوشبو هجوملرده حربي مرکزلر یاکه تینچ اهالی نشانگه آلینگنینی انیق ایتمهگن. بیراق محلي منبعلر «اطلاعات روز» گزېتهسیگه هجوملرده حربي بازهلر نشانگه آلینگنینی معلوم قیلگن.
محلي منبع نینگ ایتیشیچه، گربز اولسواللیگیدهگی «گُلها» کمپ هم نشانگه آلینگن. طالبان اوشبو کمپده پاکستان نینگ وزیرستان حدودیدن کېلگن مهاجرلرنی جایلشتیرگن.
بوندن تشقری، گربز اولسواللیگیده طالبلر مدافعه وزیرلیگیگه قرهشلی حربي مرکز هم هجومگه اوچرهگن.
منبع نینگ قۉشیمچه قیلیشیچه، خوست شهریده «صحرا باغ» حدودیدهگی طالبان نینگ حربي بازهسی هم هجوم نشانیگه ایلنگن.
بو آرهده طالبان مطبوعات سوزلاوچیسی ذبیحالله مجاهد پاکستان بوگون تانگده قندهار شهری نینگ ۹-ناحیهسی حدودیدهگی چۉل زونسینی بامباردمان قیلگنینی و بو هجوم هېچ قندهی تلفات یاکه ضرر یېتکزمهگنینی معلوم قیلدی.
خوست ولایتی والی مطبوعات سوزلاوچیسی مستغفر گربز هم پاکستان هجوملری عاقبتیده ضرر و تلفاتلر بۉلگنینی رد اېتدی.
پاکستان اخبارات و مطبوعات وزیری عطا الله ترار ایکس اجتماعي ترماغیدهگی بیاناتیده مملکت اوردوسی «غضب الحق» عملیاتی دایرهسیده افغانستان حدودیده ۱۰ ته هوا و درون هجومینی عملگه آشیرگنینی معلوم قیلدی.
اونینگ ایتیشیچه، بو هجوملر تیناوون افغانستان توپاغیدن عملگه آشیریلگن درون هجوملریگه جوابن اویوشتیریلگن.
