افغانستان سابق جمهور رییسی حامد کرزی پاکستاننینگ افغانستانگه اویوشتیرگن ینگی هجوملرینی سلبي سیاستنی دوام اېتتیریش دېب به را اتهدی. اونینگ ایتیشیچه، بو سیاستنینگ النگهسی اېندی اسلامآباد نینگ اۉزیگه هم ضرر یېتکزماقده.
کرزی بوگون (پنجشنبه، ۲میزان) فیسبوکیده نشر قیلگن پیامیده پاکستاننی افغانستانگه نسبتاً یخشی قۉشنیچیلیک تمایللریگه رعایه قیلیشگه چقیردی.
مملکتنینگ سابق جمهور رییسی شوندهی دېدی: «پاکستان ینه بیر بار قندهار، خوست و پکتیکا ولایتلریگه هوا هجوملرینی عملگه آشیردی. کۉرینیب توریبدیکی، اسلامآباد هنوزگچه اۉته سلبي سیاستنی دوام اېتتیرماقده و اونینگ النگهسی اېندی اۉشه دولت نینگ اۉزیگه هم یېتیب بارماقده».
او قۉشیمچه قیلدی: «پاکستان شونی بیلیشی کېرهککی، برچه افغانلر، استثناسیز، بو تجاوزکارانه حرکتلرگه قرشی بیرلشگن و یکدلدیر».
حامد کرزی پاکستان حکومتیدن «یخشی قۉشنیچیلیک» یۉلیدن باریشنی و افغانستان بیلن مناسبتلرینی «مدنیتلی طرزده» باشقهریشنی سۉرهدی.
پاکستان بوگون تانگده قندهار، خوست و پکتیکا ولایتلریدهگی ۱۰ ته نقطهگه هوا و درون هجوملرینی عملگه آشیرگنینی معلوم قیلدی. پاکستان نینگ ایتیشیچه، هجوملرده کېچه پاکستان حدودیگه درونلر اوچیریلگن جایلردهگی مرکزلر نشانگه آلینگن.
طالبان بو هجوملر عاقبتیده هېچ قندهی انسان تلفاتی یاکه مادّي ضرر یېتمهگنینی معلوم قیلدی. بیراق محلي منبعلر «اطلاعات روز» گزیتهسیگه پاکستان طالبان نینگ مهم حربي تاسیساتلرینی نشانگه آلگنینی تصدیقلهدی.
منبعلرگه کۉره، قندهارده مهم اۉق-داری و حربي قورال-یراغ انباری، پکتیکاده ۲۰۳-منصوري قول اردو مرکزی، خوست نینگ گربز تومنیدهگی «کمپ گلها» — او یېر پاکستاننینگ وزیرستان حدودیدن کېلگن مهاجرلر و تتپ اعضالری نینگ جایلشگن قرارگاهی اېکنی ایتیلهدی — همده خوست شهریدهگی طالبان اوردوسینینگ حربي بازهسی هجومگه اوچرهگن.
