کابلدهگی محلي منبعلرنینگ ایتیشیچه، «شیعهلر عالي کېنگشی» رئیسی محمد علی اخلاقی کابل شهریدهگی «امیدسبز» شهرچهسیده جایلشگن اویینی بۉشهتگنیدن سۉنگ طالبلر عدلیه وزیرینینگ شخصي قماقخانهسیدن آزاد قیلینگن.
منبعلرگه کۉره، اخلاقی چهارشنبه آقشامیده (۱میزان) آزاد قیلینگن، بیراق او آزاد اېتیلیشیدن آلدین اویینی بۉشهتگن.
منبعلر، شونینگدېک، «شیعهلر عالي کېنگشی» اعضاسی سید نادرشاه بحر هم اخلاقی بیلن بیرگه آزاد قیلینگنینی ایتیشماقده. بیراق اونینگ اویی حجتلر اۉغلینینگ نامیده بۉلگنی سببلی بۉشهتیلمهگن.
«شیعهلر عالي کېنگشی» رئیسی محمد علی اخلاقی همده اعضالری سید نادرشاه بحر، حاجی امیر محمد بازل، سید محسن حسینی و سید عبدالله هاشیمي ۲۳ سنبلهده طالبلر عدلیه وزیرلیگینینگ ایچکی ایشلر بۉلیمیدن و اوشبو گروهنینگ عدلیه وزیری عبدالحکیم شرعینینگ بویروغی بیلن حبسگه آلینگن اېدی.
حاجی امیر محمد بازل، سید محسن حسینی و سید عبدالله هاشیمينینگ آزاد قیلینگنی حقیده حاضرچه معلومات یۉق.
اۉشه پیتده بیر منبع «اطلاعات روز» گزیتهسیگه بو شخصلرنینگ حبسگه آلینیشی سببی حقیده گپیرر اېکن، طالبلر عدلیه وزیری «شیعهلر عالي کېنگشی»نی سیاسي-استخبارات تشکیلاتی دېب اتهگنی و اونینگ فعالیتینی ناقانوني دېب حسابلشینی ایتگن اېدی.
منبع نینگ ایتیشیچه، طالبلر عدلیه وزیری اوشبو گروه حکمرانلیگی آستیده هېچ قندهی سیاسي تشکیلات فعالیت یوریتیشیگه رخصت بېریلمسلیگینی بیلدیرگن.
منبعلر، شونینگدېک، «اطلاعات روز» گزیتهسیگه ایتیشیچه، شوندن سۉنگ بیر گروه شیعه علمالری و جماعت فعاللری «شیعهلر عالي کېنگشی» رئیسی و اعضالرینی آزاد قیلیش اوچون طالبلر عدلیه وزیرلیگیگه مراجعت قیلگن. بیراق طالبان عدلیه وزیری اولر «امیدسبز» شهرچهسیدهگی اویلرینی بۉشهتگن تقدیردهگینه آزاد قیلینیشینی ایتگن.
طالبلر عدلیه وزیرلیگی کابلنینگ غربیده جایلشگن «اميدسبز» شهرچهسینی «امارتگه تېگیشلی» حدود دېب اعلان قیلگن و اونینگ اهالیسیگه اویلرینی بۉشهتیش حقیده بویروق بېرگن.
