آسیادهگی عیاللر بیایم یورتی بنگلادشده جایلشگن بۉلیب، افغانستانلیک ۱۳ محصلنینگ اۉقیشدن چېتلهتیلگنینی تصدیقلهدی. بیایم یورتنینگ ایتیشیچه، اولر بیر نېچه ییل دوامیده اۉزلشتیریش کۉرستکیچلرینی یخشیلهی آلمهگن و یقینده بیایم یورت قاعدهلریگه موافق اۉقیشنی دوام اېتتیریشدن چېتلشتیریلگن.
بیلیم یورت «اطلاعات روز» گزیتهسیگه یوبارگن مکتوبیده ایتیشیچه، اوشبو ۱۳ کیشی محصلدن سکّیز نفری افغانستانگه قَیتگن، قالگنلری اېسه ینه بیر سمستر بیلیم یورت حدودیده قالیب، تورلی امکانیتلرنی کۉریب چیقماقده.
اوّلراق محصللردن بیری آسیادهگی عیاللر بیلیم یورتی ۱۶۰ کیشی افغانستانلیک محصلنی اۉقیشدن چېتلهتیشگه قرار قیلگنینی ایتگن اېدی. بیراق آسیادهگی عیاللر یونیورسیتیی بو دعوانی رد اېتدی.
بیلیم یورت قۉشیمچه قیلیب، هېچ بیر محصلنی اۉقیشدن چیقریش قرارینی «آسانلیک بیلن قبول قیلمسلیگینی» ایتدی. بیایم یورتنینگ تأکیدلشیچه، محصللر آغیر شرایطگه قَیتیشگه مجبور بۉلهدیگن حالتلرده فوق العاده درجهده ماسلشووچنلیک کۉرسهتیلهدی. بو نهفقط محصلنینگ بیلیم یورتده قالیش مدتی بېلگیلنگن قاعدهلردن تشقری اوزهیتیریلیشینی، بلکه امکانیت بۉلسه، احتیاجلرگه ماس تعلیم و خصوصي درسلر کبی بیر قطار قۉللب-قوّتلش خدمتلری تقدیم اېتیلیشینی هم انگلهتهدی.
اوّلراق آسیادهگی عیاللر بیلیم یورتینینگ ایکّی نفر محصلی «اطلاعات روز» گزیتهسیگه بېرگن صحبتیده اۉقیشدن چېتلهتیلگنینی معلوم قیلگن اېدی.
محصللردن بیری اۉزینینگ غربي کابلدهگی سید شهدا مکتبیگه قیلینگن هجومده یرهلنگنلردن بیری اېکنینی ایتدی. اونینگ سۉزلریگه کۉره، امتحانلر وقتیده کسللیگی سببلی بهالری اۉرتهچه کۉرستکیچی پهسهیگن و شو سببلی اۉقیشنی دوام اېتتیره آلمهگن. او بیر نېچه ییل اوّلگی هجوم عاقبتیده روحي جراحت آلگنینی و توتقهناق خروجلریدن اذیت چېکیشینی ایتدی.
یقینده افغانستانگه قَیتگن ینه بیر محصل اېسه بیلیم یورت اونی «رواجلنیش یۉقلیگی» سببلی افغانستانگه یوبارگنینی ایتدی. او هم غربي کابلدهگی تعلیم مؤسسهلریدن بیریگه قیلینگن هجوملرده یرهلنگنلردن بیری.
آسیادهگی عیاللر بیلیم یورتی قاعدهلریگه کۉره، محصل بیر نېچه ییل دوامیده منتظم روشده مینیمال اکادمیک طلبلرنی بجره آلمهسه، اونینگ رۉیخطدن اۉتیشی بېکار قیلینیشی کېرهکلیگینی بیلدیردی.
بو محصللرنینگ افغانستانگه قَیتیشی اولر اوشبو مملکتده تعلیم آلیشدن محروم اېتیلگن بیر پیتده یوز بېرماقده.
آسیادهگی عیاللر بیلیم یورتی محصللیک مقامینی یۉقاتیش افغانستانلیک محصللر اوچون جدّي عاقبتلرگه آلیب کېلیشینی توشونیشینی و شو سببلی اۉقیشدن چېتلهتیش یاکه تعلیم آلیش حقوقیدن محروم قیلیش چارهلرینی جوده کم قۉللشینی ایتدی.
بیلیم یورتنینگ قۉشیمچه قیلیشیچه، سۉنگگی ییللرده ۸۰۰ کیشیدن آرتیق افغانستانلیک محصل اوشبو بیلیم یورتده تحصیل آلگن و حاضرده ۴۸۰ کیشی محصل اۉقیماقده.
بیلیم یورت اۉزینی «یونیورسیتیلر آرهسیده افغانستانلیک محصل عیاللر اوچون اېنگ کتّه مېزبان» دېب اتهدی.
اوشبو مؤسسهنینگ معلوم قیلیشیچه، افغانستانلیک محصللر آسیادهگی عیاللر بیلیم یورتیده تۉلیق مددمعاش اساسیده تحصیل آلهدی. مددمعاش خانه، آزیق-طعام، اۉقیش تۉلاوی، طبي خدمت، سفر خرجتلری و اۉقوو ماتریاللری خرجتلرینی قاپلهیدی.
شونینگدېک، بیلیم یورتنینگ ایتیشیچه، هر بیر محصلگه آیلیک نفقه بېریلهدی و کۉپلب طلبهلر «تعلیم عوضیگه محنت» دستوری دایرهسیده بیلیم یورتده یریم ستاوکاده ایشلهیدی.
یونیورسیتی قۉشیمچه قیلیب، کۉچقینلیک یاکه باشقه آغیر شرایطلرده یشهیاتگن طلبهلر کۉپینچه کوچلی روحي باسیمنی باشدن کېچیریشینی حسابگه آلیب، روحي سلامتلیک گروهینی تشکیل اېتگنینی بیلدیردی. اوشبو گروه پسیخیهترلر، کلینیک پسیکولوگلر، مصلحت بېرووچی پسیکولوگلر همده جنسي و سلامتلیک کوریناتورلری کبی متخصصلر تامانیدن قۉللب-قوّتلنهدی.
آسیادهگی عیاللر بیلیم یورتی اقتدارلی عیاللرگه عالي تعلیم آلیش امکانیتینی یرهتیشگه صادق اېکنینی تأکیدلهدی.
آسیادهگی عیاللر بیلیم یورتی آسیاده عیال یېتکچیلرنی تعلیم و تربیهلشگه علیحده اعتبار قرهتهدیگن مستقل خلقارا تعلیم مؤسسهسیدیر.
اوشبو یونیورسیتی طالبلر افغانستانده حاکمیتنی قَیته اېگهللهگنیدن کېین مملکتدن محصللرنی قبول قیلیشنی کۉپهیتیرگن اېدی. بو طالبلر قیزلر و عیاللر اوچون مکتبلر، بیلیم یورتلر و طبیات انستیتوتلری اېشیکلرینی یاپگن و حاضرگچه یاپیق حالده سهقلب کېلهیاتگن بیر پیتده یوز بېرگن.
