ایران تشقی ایشلر وزیری عباس عراقچی ایران جمهور رییسی مسعود پزشکيان بیلن تینچلیک خبری بیلن نیویوذککه کېلگنینی، بیراق ضرورت توغیلسه، مملکتی «آخرزمان اوروشی»گه هم تیار اېکنینی ایتدی.
عراقچی یک‌شنبه آقشامیده (۵مبزان) ایکس اجتماعي ترماغیده نشر قیلگن پیامیده ایران هر قنده‌ی تجاوزگه قرشی قطعي و ثابت توریشینی بیلدیرگن.
او شونده‌ی دېدی: «مېن و جمهور رییس پزشکيان اوروشنی ساتیش اوچون نیویورککه کېلگنیمیز یۉق؛ بیز تینچلیک اۉرنه‌تیش اوچون کېلدیک.»
عراقچی قۉشیمچه قیلدی: «شونگه قره‌مه‌ی، ایران هر قنده‌ی تجاوزگه، حتا آخرزمان اوروشیگه آلیب کېلیشی ممکن بۉلگن تجاوزگه قرشی هم قطعي و ثابت توره‌دی.»
ایران تشقی ایشلر وزیری عینِ پیتده مملکتی «حقیقي دیپلوماتيک»گه هم تیار اېکنینی ایتدی.
عراقچی‌نینگ بو بیاناتلری اۉتگن هفته او هرمز بۉغازینی آچیش اوچون یېتّی کونلیک رېجه تکلیف قیلگنی، بیراق بو رېجه امریکا تامانیدن رد اېتیلگنی آرتیدن ینگره‌ماقده.
عراقچی اۉتگن پنج‌شنبه کونی نیویورکده واسطه‌چیلر آرقه‌لی امریکاگه رېجه تقدیم اېتگنینی ایتدی. اونگه کۉره، ابران اوستیده‌گی دېنگیز قملی و اقتصادي چېکلاولر آلیب تشلنگن تقدیرده، هرمز بۉغازی یېتّی کون ایچیده تۉلیق آچیله‌دی.
بیراق آمریکا جمهور رییسی دونالد ترامپ ایران نینگ تکلیفینی رد اېتیشینی بیلدیرگن و اوشبو خلق‌ارا سوو یۉلینی آچیش اوچون هېچ قنده‌ی شرطنی قبول قیلمسلیگینی ایتگن.
امریکا جمهور رییسی سۉنگگی بیاناتیده ایران بیلن دیپلوماتيکنی دوام اېتتیریشینی بیلدیرگن. او آکسیوس نشریگه بېرگن اینتېرویوسیده ایران بیلن «کۉپراق مذاکره‌لر» اۉتکزیلیشینی کوته‌یاتگنینی ایتگن.
ترامپ شونده‌ی دېدی: «اولر کېلیشووگه اېریشیشنی خواهله‌یپتی، اما بو مېن ایسته‌گن کېلیشوو اېمس. بو تخمیناً بیر ییل اوّل قبول قیلگن نرسم بۉله‌ردی. اولر اۉز کارت‌لریدن جوده کۉپ فایده‌لنیشدی.»
امریکا جمهور رییسی ایرانگه قرشی ینگی هجوملر باشلنیشی احتمالینی تصدیقله‌مه‌گن هم، رد اېتمه‌گن هم و شونده‌ی دېگن: «مېن بو حقده دایما اۉیله‌یمن.»
