ایران‌نینگ خراسانی رضوب ولایتی چېگره قۉشینلری قوماندانی مجید شجاع جاري هجري-شمسي ییل باشیدن بویان ۱۴۵مینگ ۵۲۰ کیشی افغانستان فقراسی‌نینگ ایرانگه ناقانوني کیریشی‌نینگ آلدی آلینگنینی ایتدی.
ایران‌نینگ ایرنا اخبارات آژانسی خبریگه کۉره، او چهارشنبه کونی (۷-میزان) اۉتکزیلگن مطبوعات انجمنیده سۉزله‌گن. شجاع بو شخصلرنی «چېگره تجاوزکارلری» دېب اته‌ب، اولر قۉلگه آلینگنی و افغانستان‌گه قَیتریلگنینی بیلدیرگن.
اوشبو ایران رسميسی افغانستان وطنداشلری‌نینگ ایرانگه ناقانوني کیریشی تۉرت برابردن کۉپراق آشگنینی ایتگن.
او شونده‌ی دېگن: «اۉتگن ییل نینگ دستلبکی آلتی آییده خراسانی رضوی ولایتی چېگره‌لریده ۳۹ مینگ ۳۱۱ کیشی ناقانوني افغانستان فقراسی قۉلگه آلینیب، مملکتدن چیقریب یوباریلگن. اوشبو رقملرنی جاري ییل آماری بیلن تققاسلش چېگره تجاوزکارلرینی قۉلگه آلیش حالتلری ۴.۵ برابرگه آشگنینی کۉرسه‌ته‌دی».
خراسانی رضوی ولایتی چېگره قۉشینلری قوماندانی جاري ییلده ۲۴۰ مینگ نفر افغانستان فقراسی ویزه آلیب ایرانگه کیرگنینی هم ایتگن.
اقتصادي وضعیت نینگ یامانلشووی و ایشسیزلیک سببلی افغانستان یشاوچیلری ایش ایزلب ایرانگه باریشماقده. شو بیلن بیرگه، ایران افغانستانلیکلذ اوچون ویزه بېریشنی چېکله‌گن. اوشبو چېکلاولر یانیده اَیریم افغانستان فقرالری مجبورلیکدن ناقانوني مهاجرت یۉلینی تنله‌ماقده. بو خوفلی یۉل بۉلیب، کۉپلب مهاجرلر منزلیگه یېتیب باره آلمه‌یدی. فقط جاري ییل‌نینگ اۉزیده اۉنلب افغانستان وطنداشی ایرانگه ناقانوني یۉل آرقه‌لی کېته‌یاتگنیده آچلیک و ترافیک حادثه‌لری عاقبتیده هلاک بۉلگن.
