تنسی ایالتیده اۉلیم جزاسیگه حکم قیلینگن عیال قتل اېتیلگنیدن کېین تیریک قالیب، شفاخانه‌گه آلیب کېتیلدی.
رویترز خبریگه کۉره، کریستا پایک‌نینگ اۉلیم جزاسی چهارشنبه کونی کېچقورون (۸ـمیزان) اۉلیمگه آلیب کېلووچی دارو واسطه‌لرینی یوباریش آرقه‌لی اجرا اېتیلگن، بیراق او تیریک قالگن.
قماقخانه رسميلری بو حالت تنسی ایالتیده قریب ایکّی عصر ایچیده عیالنی قتل اېتیشگه قیلینگن ایلک اورینیش‌نینگ موفقیتسیز یکونلنگنینی معلوم قیلگن.
رسميلر واقعه‌دن کېین پَیک‌نینگ احوالی حقیده درحال معلومات بېرمه‌گن.
کریستا پَیک‌نینگ وکیل مدافع‌سی اونینگ اۉلیمگه آلیب کېلووچی دارونینگ ایکّی دوزه‌سی بیلن قتل اېتیشگه اورینیش موفقیتسیز توگه‌گنیدن سۉنگ، شفاخانه‌گه آلیب کېتیلگنینی ایتگن.
اونینگ حقوقي جماعه‌سی قتل جریانی دوام اېته‌یاتگن پیتده حکم اجراسینی توخته‌تیش حقیده فوق العاده عریضه بېرگن و: «پیک هوشینی یۉقاتگن، بیراق اونینگ یوره‌گی حلی هم اورماقده و خیریلله‌گن آوازی اېشیتیلماقده»، دېب بیلدیرگن.
پَیک‌نینگ ادواکتلریدن بیری بی‌بی‌سی‌گه ۵۰ یاشلی عیالگه ایکّی سرنگ پنتوباربیتال یوباریلگنیدن سۉنگ، حاضر شفاخانه‌ده «حیاتینی سه‌قلب قالیش چاره‌لری» کۉریله‌یاتگنینی ایتگن.
پیکې ۱۹۹۶-ییلده ۱۹یاشلی کولین اسلِمِرنی اۉلدیرگنی اوچون اۉلیم جزاسیگه حکم قیلینگن. اونینگ حکمی اجرا اېتیلیشیدن آلدینگی سۉنگگی لحظه‌لرده حقوقي کوره‌ش یوزه‌گه کېلگن.
آخر-عاقبت، امریکا عالي محکمه‌سی اۉلیمگه آلیب کېلووچی دارو یوباریلیشیگه رخصت بېرگن.
پیک ۱ه۸ یاشده بۉلگنیده اۉشه پیتده‌گی سېوگیلیسی تادریېل شیپ بیلن بیرگه ۱۹ یاشلی کولین اسلِمِر نی کلتکلب، قییناققه سالگن و اۉلدیرگن. اولر سلېممېر بیلن معمالی اۉسمیرلر اوچون تشکیل اېتیلگن کسب-هنر اۉقوو لاگېریده تنیشگن اېدی.
سلېمیر نینگ آنه‌سی مېی مرتینېس پَیک نینگ قتل اېتیلیشینی طلب قیلگنلردن بیری اېدی. او چهارشنبه آقشامیده‌گی واقعه‌لردن سۉنگ «بو شرمنده‌لیک بۉلدی»، دېدی.
آسوشیتدپرس خبریگه کۉره، پَیککه پېنتابربیتل کیمیاوي مادّه‌سی‌نینگ ایکّی دازه‌سی یوباریلگن و گواهلر خانه‌سی پرده‌سی ایکّی مرته یاپیلگن.
اخبارات آژانسی خبر بېریشیچه، قتل جریانی‌نینگ بیر باسقیچیده عامه‌وي اخبارات واسطه‌لری وکیللریدن خانه‌نی ترک اېتیش سۉره‌لگن.
آسوشیتدپرس‌نینگ قۉشیمچه قیلیشیچه، تنسی ایالتیده‌گی قتل پروتوکلده، اگر شخص بیرینچی این اېکسيه‌دن کېین وفات اېتمسه، دارولر سالینگن ایکّینچی شپریتسلر تۉپلمیدن فایده‌لنیش کۉزده توتیلگن. بیراق اوشبو پروتوکل شخص ایکّینچی تۉپلم یوباریلگنیدن کېین هم تیریک قالسه، قنده‌ی چاره کۉریلیشی کېره‌کلیگی کۉرسه‌تیلمه‌گن.
